قالولى عليك
ــــــــــــــــــــ
قالـولى عليـك
قالولى عليك
بإنك طير و متغرّب
و إنّك يوم ما بتقرّب
عيونك صيف
و إنّك كالنسايم ضيف
بدقات قلب حيرانه
و روحك فى الهوى دايما
بكاس الحب سكرانه
و قالوا لو يجيلك يوم
مزهّر فى الغرام ياسمين
حا يدبل بعد يوم و اتنين
ما يتحمّل
و شوقه فى الهوى
تخاطيف
و صبره ضعيف
بيسقط زى ما يكون طيف
بلا تقطيف
فى وقت خريف
و بيعلّم
فى حبه يسهرك بالليل
يدوق رمشك دموع الويل
و يتألّم
وعشقه بالفراق ملضوم
و قلبه من الحنان محروم
و قلبك لو بإيه حا يكون
ما يقدر يوم
يطول حبه
ف قلت لهم:
يا أهل اللوم
باحبه
و امّا بلمح يوم
رموشه فى الهوا تهزهز
أنا اتلذذ
تقولوا :
ميّته فى هواه
حا ارد و اقول لكم ميت آه
أنا عشقاه
و قلبى منّى راح له خلاص
و دايب له رضا و إخلاص
ولا يمكن لى منّه خلاص
لا بالراحه
و لا بقوه
و لو تبنوا حيطان بنّا
دا قلبى سكّنه فى العين
و قلبه حبنّى حبين
فى ننى عيونه من جوّه
ف قولوا ليّا أى كلام
و قولوا عنى أى كلام
لــــــــنـــا سامعه
و لا هــــــــوه
( أمل درويش )
.jpg)
