وب أغير عليكى....!!!
وب أغير عليكى....!!!
لما بيلمس قبلى شفايفك ..بعد ماياخد منك "أطة"
وإنتى ف حالة نشوة غريبة.....!!!
لما بتسكن ريحته عيونك.. بعد مايضحك ليكى أونطة
وأبقى ف حالة غِل مريبة...
قلبى ساعتها مولع شطة....
نفسى أديله ساعتها "بونية"
وأكسر ودنه البارد ده...
وأكسر عينه إبن الحرامية
علشان بس مابيتسهوكش و..يبقى يبطل كلمة "هه"
ولا يعاكسك لما شفايفك منه بتشرب..
ليه مش فاهمة ياست الناس
إن صحيح أعصابى بتتعب....!!؟
وإنى ب أحبك حب كبير
وإنى ب أغير
وإن مافيش ف الكون دا بحاله....
واحد حبك أبدا غيرى وعنده ضمير...!!!
وإنى ما أطقيش أشوف ف عيونك ...
ضحكة بريئة لواحد تانى
عارف إنى غتيت وأنانى...
وإنى خنيق.......
جايز خُلقك منى يضيق....
جايز مرة ب أم غلاستى...
ملقاش منك ضحكة ب ريق
علشان خايب ومزودها
كل ما أقولك آخر مرة
غصب عنى حمار و ب أعيدها
ما أنا لو شايف غيرك عادى....
لكن شايفك إنتى وبس..
كل ما أروح بتكونى قصادى
حتى ف سير الدنيا العكس
عمر ماكان للشعر معانى
غير ف خدودك وإبتسماتك
ما أنا لو أقولك عن كراماتك..
كنتى عرفتى بإن الشعر..
بقى ف عيونك شىء يتحس
عذرا يا اللى بحبك جدا
جدا جدا جدا جدا
يا اللى يوماتى أقعد وأكتبلك
كل ما فجر عنيكى بيدن
ليست هناك تعليقات:
إرسال تعليق