انا ابويا واحشني جداً
محتاج رأيه ف حاجات
أهمل ف سؤاله عني
وماجاش من يوم مامات
نضارته وساعته لسه
ع الرف مكان ماسابهم
وهدومه جوه كيسهم
وجُداد من يوم ماجابهم
نفسي اتكلم معاه
واحكيله ع اللي تم
وهاقوله مين ف مرضه
زاره ونقل له دم
وهاقوله اني اسف
علشان خبيت عليه
واحلفله باني نفسي
لو يوم المس ايديه
واعمله شاي خفيف
واقسم وياه رغيف
كان جبنه بقوطة باين
او يمكن جبنة بس
انا عارف انه سامع
متأكد انه حس
ماهو برضه الموت لايمكن
يقتل ف الناس شعورها
ومافيش ف الدنيا شجرة
تقطعها من جذورها
ومافيش ف الدنيا راحل
الا وسايب وراه
واحد من صلبه شبهه
يدعيله ف الصلاه
انا ابوياً واحشني جداً
وحشاني معاه حاجات
بطلت اعملها وحدي
من ساعة لما مات
ليست هناك تعليقات:
إرسال تعليق