ونهرب م الشّراك منك
.............................
ما يصعبشي عليك غالي
ومن امتى .....
أنا بصعب على قلبِك
ومن امتى عشان ....
خاطري..
بتجري دموعِك الغاليه
على خدودك
ويتحاش الكلام المرّ
عن صوتِك
وترميني بضحكايه ..
غريبة تخش جوايا
أحس بطعمها المالح
كما السكين
بتسرق من سنين عمري
شجر أخضر
فرَح طارح
على فكره ..
أنا مسكين
ماليش ف الدنيا
غير روحي
وروحي ساكنه جوّاكي
ما فيش فايدة
ما طول عمري ...
أنا بادّي
وطول عمرك
تبصي وتضحكي وتاخدي
وترمي شعرك الليلي
ورا ضهرك
يهفهف وانتي بتميلي
أحس بشهوة الموعود
واقول امرك
تمدّي إيديكي نتصافح
أخاف منك
وترجع خطوتي تاني
وتتسرسب حروف مني
اجمّع نفسي القاها ... والقاني
بعزم الصوت
نقول ... ( تاااااااني )
ونهرب م الشّراك منك
تردّي ...
- مسيرنا نتصالح
ولو بتموت
ـــــــــــــــــــــــــــــ
سمير فرج عبد القادر
(مصري شاعر)
ليست هناك تعليقات:
إرسال تعليق