رحل اليوم الشاعر أكرم عبد السميع ابن سوهاج وشاعر العامية بعد معاناة مع المرض
فى ذمة الله تعالى الشاعر اكرم عبد السميع ذهب جسده وبقت روحه وكلماته عبيرا خالدا , كان لشعره عندى مذاق خاص بصدقه المفرط واحساسه الطيب النابع من قلبه المليء بالحب , سنظل نتذكرك بكل الخير وندعو لك بكامل المغفره ومن قصائد الشاعر الراحل
كفايا عناد
كفايا عناد
ونار جوايا تكوينى
عشان بعدك
دا شئ واعر
ونسيانك
أكيد برضك على عينى
باحبك000
مهما طال البعد
ومهما تدبحى فيا
أمل عايش ف وجدانى
ليالى طوال
كتبتك ستميت موال
ولسه يادوب أنا هابدأ
ف وصف عيونك الحلوه
ونظرتها
ورقتها
وصوتك لما بيجينى
بيحيينى
يخلينى
مانيش قادر على فراقك
انا وانتى صحيح اتنين
لكن دايما بيجمعنا
طريق واحد
شعور واحد
ونبض القلب جوايا
يردد اسمك الغالى
واحوالى
بقت فعلا
بتمشى يم أحوالك
وافكارى
بتتخبل بأفكارك
انا وانتى صحيح اتنين
لكن دايما بيجمعنا
كيان واحد
وجع واحد
هموم تسكنا
تتعبنا
كأنك ليا وجدانى
وأحلامى
وايامى
كأنك نبض شريانى
بلاش العند يبعدنا
بلاش قلبك يكون جامد
ولا حضنك يكون جاحد
دانا وانتى صحيح اتنين
لكن فى الاصل
شئ واحد
ليست هناك تعليقات:
إرسال تعليق