هنا طاهر
هنا القلب اللى علم روحى تتظاهر
وأشهر كلمته وصاهر سجون فرعون
وحارب ضحكة السيّاف
وعاش حريّة المسجون
وقف على دكّة الأعراف
وغيره لجنّتك مرهون
هنا طاهر... يا أرض العبد والظربون
يا أرض التين ماهوش طارح
يا أرض القمح مش موزون
هنا طاهر يا بنت الغاوى والملعون
يا بنت الشاعر المفتون بملك قارون
هنا طاهر...
(بيحبى تحت سقف) الكون بدون ما يخون
بدون ما يهدّ مخزونك... وغيره بيسرق المخزون
هنا طاهر... ما باعش ف يوم... وتاجر غيره بالمكنون
هنا الشعر اللى عاش محزون وراهن ع البلاد الدون
هنا طاهر يا دقّة هون على دماغى
يا طفلى اللى ابتدى يناغى
يا لدّاغى ف حروب القوت...
هنا طاهر....
هنا الحرف اللى عاش قاهر كراسى الموت
هنا الوطن اللى نادى بصوت
هنا طاهر وليد التوت ونبت الضى
وريدى الحىّ لحظة ما الكلام بيضيق
شراع المركب الثاير على التحاريق
سحابة صيف تبل الريق
هنا طاهر رفيق العتمه والتضييق
رفيق تقفيلة المخاليق على المخاليق
هنا طاهر شقيق البوح
هنا طاهر...
(بيحبى تحت سقف الروح)
هنا طاهر...
قتيل الملغى والمسموح
وطن مطروح على الأحمال
هنا طاهر....
(لحظة طلوع الشمس من عبّ العيال)
(طارت مناديل السعاده) من الكنال
علمنى أبويا الارتجال يا أمّه
(طريق مفتوح ف ليل أعمى)
هنا طاهر...
قتيل الغُمَه والعاده
طريد المعركه السّاده
هنا طاهر...
(طارت مناديل السعادة) وبعتروا الأمه
ضمينى ضمّه وسيبى قلبى براح
(طالعين لوش النشيد) ومواكب الأفراح
أتراح وهتعدى
هنا طاهر....
(لحظة طلوع الشمس من عبّ العيال...
مفتاح سكات الأرض بيصدّى)
القلب بيهدّى ف أراضى الزيف
كتر النزيف واشتد
والمعركه بتحتدّ
وايديكى دايره تعدّ فى الجرحى
وحبيبتى لابسه الطرحه والخلخال
طاهر بلال العصر ع المدنه
ضحكة بيان الهدنه للأتباع
طاهر ما باعش وكلّنا بيّاع
يا ضباع بتسرق نومة العازب
خمسين سنه والحمل مش كاذب
والفرح مش جذاب ولا جاذب ضياع القصر
هنا طاهر.............. وطينة مصر ولاده
هنا طاهر...........
....................... قتيل المعركه السّاده
****************************************
الموجود بين قوسين هنا من أشعار الشاعر الكبير طاهر البرنبالى.............. أو عناوين بعض دواوينه...............
*****************
سعيد شحاتة
ليست هناك تعليقات:
إرسال تعليق