اتعوج جسد المغنى
وعصر عنيه ملقاش دموع
شد أعصابه .. وزم على كفه بقلق
ضغط على حبه ألم
لمهم بالعافيه من جسده النحيل
نزوا من بين الصوابع
عرق ملايكه – ودم مالوهوش لون حقيقي
عبى صوته – زقزقة عصافير بتنهج
وحضن في عينه المقفولين
عشق البنات / هجر الحبيب / وصل اللى غاب
جرح القريب / وجع الهوى لفؤاد وحيد
وحاجات كتير مالهاش تمن
كبتها أوهامه على دماغه ولاميه ساقعه
جايز بتحصل كل يوم
جايز بتسرق من عنيه
لحظات جنازه بتفترى على فرحته
كان نفسه يطلعوا كلهم – كده مره واحده
ولا سرب متزنق ومش حاسس دفا
أتنفض .. هز في دماغه
شنج في جسده
وكأنه مطعون من ورا
وبنص بصه طل ع الصاله بتوجس
حسس على أهه
تكون تاهت من بق متأثر بجد
أو نظره فيها شوق ملسوع
يرحمه م القتل عمد
أو حتى نظره . نص بسمه
تسقى روحه .. وتزمل الجرح الجميل
يسكر يلعلع
النص بصه أتدحرجت في مكان غلط
ومفتاح القزايز بيخبطه الجرسون
وينده – حاجه ساقعه
ويبص لتحت رجله
علشان ما يخسرش اليوميه
وولد وبنت في غنوه تانيه أخرها رعشه
النص بصه أتمرمطت
عضت شفايفها وبكت
لحظه ماردت تانى عِينه
كانت بتوجع
نزلت دموع بجد
ليست هناك تعليقات:
إرسال تعليق