ربي العظيم ..
بعد الثناء و الحمد و التعظيم
بعد البُكا ..
لمجرد اني ف حضرتَك ..
قررت ابوح
بعد الطمأنينه الكبيره و الونس وحاجات كتير
عارف يا رب ان انت بس ..
على كل شيء فعلاً قدير
ربي العظيم ..
بعد الصلا على سيدنا والنور اللي فينا
واستغفاري من ....
بنت ف سنة 2005
حضنتها ف "شارع فؤاد"
عَفَّرت يومها شعرها بالذنب
وجهرت بالمعصيه ..
بنت ف عيون اسكندريه أيلاينر وكحل
غمزتلي ع الكورنيش
ضحكتلي فابتهجت ملامحي
ودَمَّعِت جوايا روح
مكانتش تعرف إني سافل كده
غير لما رُحت معاها " كامب شيزار "
وف أوضه فوق السطح
بتطل ع السماوات
ولا خُفت يومها من السما تغضب
ولا خُفت م المطر اللي بل الجلد حتى
يعترف للناس
ربي العظيم ..
أنا كنت ضل بيتحدف بالطوب
والفقر
والخوف
والوجع
براويز بتسجن صوري دايما ع الحيطان
مش قصدي ابرر شكل إجرامي الفظيع
نطيت بعِزم ما فيا م البراويز
ورمحت جريّ بقلقي ع الكورنيش
لكني عمري ما كنت ف المشهد
أنا كنت خلفيه
أنا كنت مزيكا
لعيال نشاز جدا منتوره حواليا
ربي العظيم آسف
مش قصدي أتنرفز
ولا قصدي تون صوتي
يطلع من المناجاة للدوشه وصريخها
أنا كنت م الآخر
مجرم
وطيب أوي
وساعات منور أوي زي الغيطان و الورد
وساعات مضلم زي بيت مهجور ..
ربي العظيم ..
أنا عمري فعلا ما اعترضت على الوجع
صبراً .. صبرت
وجعاً .. أخدتُه ف حضني من 20 سنه
عيطْت ف جيوب الليالي ..
وحَمَدتَك ونمت
والفقد ..
عادي ..
كنت باسمع نقر رجليه ع السلالم
جي يخطف مني حد بحبُه ويسيبني لعياطي
وبعدها باستغفرك
وباكمل التعب المقدس بابتسامه وسجده وبرُبعين خُفاف
ربي العظيم ..
فعلا تعبت بشكل مش ممكن بقى
وبقيت
ب
خ
ا
ف
ليست هناك تعليقات:
إرسال تعليق