رشا فؤاد تكتب : تصريح مابيعرفش بروتوكول

تصريح مابيعرفش بروتوكول

تعرف............
تدشين الخلق للسعاده
علي صفحه الأسفلت
عمري ما هيرتب أوراقه
مواثيق رسميه لتزييف الأرض
موت الفكره ف العقل الباطن
دايماً بيكون ...........
الرحله الواقعيه ف نور الشمس
للقلب الزهقان
من ضل خيالات المآته
فتلون معادلات الدموع
البيات الشتوي للفرح
ف حزن سندرلا بتساؤل
هو انتي مين.........
يا حكايه بتطلع السلم كراكيب
كارهه تكمل توقيت مبهم لعلامات الشروق
يملكنى تمرد إنسانى
أمسك منديل الوجد والشوق للحقيقه
يتقص شريط استقبال
الجمهور جوايا للفيلم الأكشن
من خناقات الشارع
ف عيون الحارة
أتعلم من خط الزمن الداير ف الأيام
إن الوطن الأكبر ف خلايا الدم
مناعاتى الباقيه...
أصرخ تصريح مابيعرفش بروتوكول
يمكن يشنقنى ف المرايات المسكونه بالعفاريت
ماهو مش معقول أتعايق بواجهة الكدبه
والوقت تراكيب مشهد مقتول ف السيما
ووثيقه عقد جواز عرفى ف حلال وحرام
خلتنى ساعات باكرة شكل التوقيت الصيفى
اللى بيجبرنا على تعايش سلمى
لسمانا الهربانه ف زيبق
نشرة الأخبار..
ممكن اكون مجنونه سعيده
وممكن اكون أعقل م المجانين
وممكن..........
ممكن...........
ماعرفش
الإحتمالات الوارده فى تحليلى
أنا قابلاها
تصالح مع نفسى ف كل قصيدة
بتشكيلى وباشكيلها همومى
إصحاب ما بيفترقوش عن بعض
لما يشوف كفى خطوطه
الأرض العطشانه لفضفضة الشعر
تساؤل فى دماغى
هو انا ليه ف صمتى المكبوت بتحاصر ثايرة