شدة و تزول يا بلدنا
ها نرد الكلمة لأحرارها
و الراية هاتحضن ثوارها
و الأرض ها تطرح نوارها
و الهم يزول يا بلدنا
...........................
حالفين بكتابك ونشيدك
لنكون ضحكاتك يوم عيدك
و المجد يكون قبضة إيدك
و الإيد هتطول بجهادنا
شدة و تزول يا بلدنا
.................................
و لا غارة و تفجير و كماين
و لا غادر يقدر و لا خاين
على برعم طارح ف جناين
ندهة أرغول شادة عمادنا
شدة و تزول يا بلدنا
............................
اشهدى و انا شاهد و الدنيا
الشر هيتلم فى ثانية
لو إيد الخير حاضنة التانية
و النور موصول على ندا مادنة
شدة و تزول يا بلدنا
........................
هانرد الحق لأصحابه
حق الشهدا و اللى تصابوا
و الكدب هايشنق نصابه
ابن ام الغول اللى فسدنا
شدة وتزول يا بلدنا
...........................
انتى اكبر و أعز و أكرم
من أى غباوة بتستحكم
فى عقول مليانة عطش للدم
و الغبا مسئول عن أحقادنا
شدة وتزول يا بلدنا
....................
و لا ميت مليون إرهاب يا بلد
من كل نهار راح يجى ولد
بالعلم الضى و نوره أبد
هايرد يقول إلا بلدنا
شدة و تزول يا بلدنا
ليست هناك تعليقات:
إرسال تعليق