الأحد، مارس 01، 2015

أنا مش مغيَّب بالسفر للوهم..عبد الله صبري





أنا مش مغيَّب بالسفر للوهم
ودروب الخيال
وعارف ان الصدق والنبل العبيط
مالهمشي سِعر
وعارف ان العصر دا مش عصر شِعر 
وعارف ان الكلمة لو خرجت لناس ما يقدروش
توجع صاحبها كأنها جرح انفتَح
أو شرخ سلم ع الفؤاد في المُفتتَح
أنا مش رومانسي بوردتين انا واقعي
لكن باعاقب واقعي
بالعزف ع الصهد البغيض
واخلق من الأشلاء وميض
يمكن ينوَّر نُص متر ف أي حتة 
يصلح لقعدة لواد وبنت بيحلموا 
أو بطانية لطفلتين اتيتموا
وحروف لناس اتكلموا..... وقت السكوت
باكتب ومش قاصد أعيش
باكتب عشان الموت يموت
مش عايز الشارع يموت فيا
أنا عايز الشارع يعيش شاعر
ويوصَّل الحدوتة للجايين
رغم الليالي وحكمها الواعِر
الشعر مش تصقيف كتير في الأمسيات
ولا كام قصيدة في الجرايد والشاشات
والناس تحبك / تعرفَك 
الشعر يعني اني اعرفَك
من غير ما اشوفك / بانزفك
حاسس بجرحك / غربتك
ضحكك عليك لجل الأمور تمشي
لسا القصيدة حاجات ما تتقالشي
قلشك وقلشي فــ أزمة التغريب
كل الحاجات متحددة بالظبط
إلا العذاب الشعري / بالتقريب
أنا زيكم خايف من المستقبل
بارفض.. أعاني ... واتوجع لما اقبَــل
شلت الشنط ونسيت اشيل أولادي
وبلادي غنوة لسا جوا الدُرج
ودماغي فصل فــ حصة فاضية وناسي
إن العيال ينقصها هرج ومرج
أنا مش مغيب ع اللي حاصل فيكم
باكتب عشان يبقى اللي حاصل ليكم
أفضل اموت بيكم وارخَّص دمي 
هتموت حاجات أغلى إذا هارضيكم

ليست هناك تعليقات: