قصيدة من " وزّة شيطان " للشاعر سيد لطفي

وماتعجبيش
لو كل ما اسمع عبد الوهاب بيغني :- 
" حبيب الروح "
إني ابكي
***
فرحك ما آنش أوانه ؟
دلوقت آن الأوان
جرحك ما طابش زمانه ؟
دلوقت طاب واتنسى
***
فاعشقي 
وافردي الخطوة 
اسبقى
كل اللي فات منك سعادة 
هاتلحقيه
***
بس اسمحيلي
وانتي بتهزي فروع الكون بضحكة
وانتي بتغني مع وردة :-
" باحبك "
إني ابوس خد التراب اللي جمعنا 
واني اعيش على نظرة غامضة من عنيكي بألف معنى
واني اموت وانا باعشقك
وأعيش وحيد
أنا نجيب الريحاني
وانتي ليلى مراد