أول دكتور تطعيم
إداني ميدالية هدية
علشان تشميرة كُم
وأنا كنت باساوم أمي
تديني فلوس من جيبها
لهدية عيد الأم
وساومت سلالم بيتنا
إن انا مش هاجري عليها
وقصادها ما تتعبنيش
وساومت كتير دكتوري
علشان يكدب على والدي
ويقوله ابنك هيعيش
وساومت الموت على حاجة
ومفيش داعي إني اذكرها
علشان ما اخلفش الوعد
وساومت الحب الأول
إن انا مش هاعرف غيرها
علشان نفضل مع بعض
وساومت الحزن بضحكة
وساومت الضحكة بوحدة
وساومت الوحدة بواحدة
وساومت الواحدة بشك
فـ ساومني الشك عليها
من باب تطهير الذات
وكبرت شويه لقيتني
قضيت عمري مساومات
علشان مهتم بحاجة
بتضيع قدامها حاجات
.
#مساومات
ليست هناك تعليقات:
إرسال تعليق