لله .... أمل يا محسنين... الشاعر مصباح المهدي

لله .... أمل يا محسنين

أنا زى ما محتاج أمل 
محتاج تقى ..
محتاج عطاء
محتاج صفاء.. محتاج هدى 
محتاج ندى.. محتاج شروق
محتاج ضحى/ محتاج سحر
محتاج صباح/ نور أمنيه
بسمة/ دعاء/.. نسمة رجاء
وردة/ عبير/.. نشوى/ حياه
رضوى/..علا/.. لبنى/..لميس
هند/ ابتسام
رحمة/ وئام 
سلمى/ سلام 
محتاج أمل 
لله .. أمل يا محسنين
بأحلم ما عنديش حل غير
أحلم واطير
يارب خير
وأهرب من الصيف للشتا
ومن الشتا للزمهرير
ولو انى مش فاهم حقيقى 
أصل كلمة زمهرير
قول والسلام
يارب خير
لله .. أمل يا محسنين
شاى مر 
طعم الميه مر
أيامى ديزل فوقى مر
مابقتش أشتاق 
خلصوا ع الشوق كمان
مابقتش حزنان
الاسى عدا بزمان
هيكل بلا .. شبكة مشاعر
منتهى املى مكان
أدارى فيه..
تحت السرير
فوق الدولاب
لو بإذن السيد تراب
احساس مضاعف بالخطر
احساس بلا معنى الوجود
من غير أمل
لله .. أمل يا محسنين
محتاج ياعالم ابتدى
يوم بابتسام
أسهر انام
من غير أسى
من غير ما يستفرد بى غول
لو حتى كان عيونه حول
يفضل هدف
قلبى التعيس
الجمله كيس متفجرات
والنظره سكين مفتري
جوايا فات 
محتاج امل
محتاج روشته ترد لي 
عمري اللي فات
لله .. أمل يا محسنين
لو سكرك زاد حبتين
ادلق عليه شاي مر
تلقاه اتظبط
أصعب مصيبه بالعبط
راح تنجلي 
يا تكون ولي
حواليك مقام
يا تكون كما كانوا كما
طلعوا بأسباب للسما
لساك كما ولدتك أمك كلما
حرقوك نما لك جلد غير
يارب خير لله أمل يا محسنين