الساقية الدايرة في قلب النسيان
منديل ونسان .......
بدموع البنت المشتاقة
لملامح واد ساكن روحها
راكب في القطر اللي ما بيجيش
فتموت وتعيش
في اللحظة الواحدة 200 لحظة
مش كل الناس اللي ملاحظة
ملامحها بتقدر تقراها !!!
برّاها.....
هيمانة وعاشقة
ومستنّية ومش شايفة
تجاعيد الوش اللي بتاكل
في جبين الصبر
وسنين العمر اللي بتملا الأحلام تجاعيد
جوّاها..........
جدول مواعيد
بيرتل دمع العين في خشوع
فتشوفه قصادها وطن موجوع
مشتاق لعياله اللي مهاجرة
برّه الشريان !!!!
وفي قلبه مكان
لسّاه محتاج ضمة روحهم
مرسومة خريطة ملامحهم
على كف البنت اللي بتشبه
روح النسيان....
و وطنها رغيف
متغمّس جوع !!!!
مسكينة البنت اللي بتحلم
برّاها سفر....
جوّاها رجوع
::
منى حواس
" من وحي اللحظة"
كملي كل القصايد مني
حاضر باجيبها اهو
زاد المسافر غُربته
والغربة ما تلمّش بَدن
والليل شجن
ساكن عينيك الطيّبة
وعينيك عيال
بتوزّع الرحمة على المساكين
موال حزين
بالآه يلفّك والوهن
يا طيبين .....
الطيبة مابتنفعش حد
و ان جعتوا ما تأكلش عيش
لا جناحها بيخلّيك تطير
ولا روحها بتلفّك سما
وإزاى سماها تكون ونس
وفضاها ريش ؟!
فارد حصيرُه في العرا
ياهل ترى
مبسوط كده ؟
وإنت المسافر في الوجع
فارد شراعك دمعتين
وإزاى تآمن للسنين ؟!
ولا عادش في المركب أمان
الكل خان....
حتى اللى كان
روح البلد....
أول ما حس إن الغلابة بتنتشى
مع طلّة الشمس اللى مربوطة بعينيه
بإيديه جَلد ضهر الفقير
والسوط وجع
كل اللي كان مادد إيديه
مستني إيه ؟
تموين ودعم وكهربا
وحدود تلمك ع الوطن ؟!!!
روح الوطن متغرّبة
والغربة ما تلمّش بدن
::
منى حواس
" سفر "
ابن العم.....
لسّه الضحكة على الشمّاعة
مستنيّة تضم قدومك
فرحة بنت بتشبك توبها
بكل شجاعة ف طرف هدومك
عاشت يومك.....
وإنت إزاي لسّاك بتفكّر
إن البنت الشهد السكّر
يوم ما هتفطر
يبدأ صومك؟!!
حقّي ألومك .....
وإنت طبيعى تحب الحق
لو كان قلبك يوم يتشق
مين غير قلبها يخرج منّك ؟!
والا بتتقّل يعني اكمنّك
عارف طبع البنت في شوقها
وانك نبض بيملا عروقها
وإنها يوم ما تبطّل تعشق
هايكون قلبها بطّل دقْ
::
منى حواس
للولد الغايب من مُدّة
و برغم الشوق اللي اتعدّى
كل خطوط البعد ما بينّا
و برغم الحزن اللي ساكنّا
و برغم الوجع اللي ماخلّاش
في الروح ولا سنتي يحس الفرح
و برغم الجرح اللي ورثته
عن قلبك قبل ما يهجرني
طيفك زارني .....
خلّاني ف لحظة شوق أسأل
عن أخبارك
فإزي الحال ؟؟؟
ان شالله تكون أحوالك أحسن م الأول
و ان شالله يكون وجعك
دلوقتي اتحوّل للبهجة
و يارب الضحكة
ما تعرف تخرج من بابك!!
طمني عليك .....
لسه بتتعصب على روحك
من كل اللي يقول لك مالك ؟؟
لسه لسانك ......
أطول
من أيام الفُرقة ؟؟
لسه الشغل و تعب الدنيا
بيجري ويسرق عمرك سرقة ؟؟
أخبار البيت اللي بنيته
مع بنت اتخلقت من ضلعك
كملان دلوقت ؟؟!!
و الا انت الوقت مالوش لازمة
في حسابك حتى إن كان لك بيت !!
تعرف لو كنت في يوم حنّيت
لضلوعي ......
أنا كنت هاقول لك لأ...
علشان الفرق كبير جداً
بين بنت بتفرح لنجاحك
وبتشرب في الحزن جراحك
و تحسّك حتى إن كنت بعيد !!!
و بنت طموحها تكون في البيت
قبل ميعادك
تتنرفز لو جيت متأخر
علشان عاوزاك
تلحق ......
ويّاها الغدا قبل ما يبرد
فما تتأخرش !!!!
::
منى حواس
" من وحي اللحظة "
إلى البنت اللي كانت
صاحبتي جدّاً....
وكان يحلالى اسمّيها
ساعات بنتي
وكنت تملّى اخبّيها
في روحي عشان
ميحسدوناش !!!
وكان صوتها معوّذتين في احساسي
وكنت اخاصمني لو شكّيت في إخلاصي
تجاه مشاعرها أو حسيّت
بإني نسيت أحن لها
بقالي كتير باعدّى لها
واقول مايصحّش اخسرها عشان وعشان
وكل ما كان وجعها يزيد و تجرحني
اقول طبعا ما تقصدشى
و اسيب المركبة تمشي
لكن موج الوجع عالى
وزاد الحد فوق شطُّه
وزاد حدُّه عن المألوف
لاقيتني باشوف
حاجات ياما
قفلت عينيا عن شوفها
فأنا اسفة يا بنت الروح
معادش يلمّنا إحساس
ولو حبيتي نتعاتب
مافيش مانع تعاتبيني
وحاسبيني
في كام مرة جرحتيني
وانا اضحك لك
عشان مش قادرة ابين لك
شعورى اما ......
خذلتيني
برافو يا صاحبتي جداً
يا فاهمة إنك خدعتيني
مافيش مانع تحاسبيني
وتسقيني الوجع مرّات
أنا اللي خسرت ياما حاجات
فعادي لو خسرتيني !!!
::
منى حواس
" من وحي اللحظة "
عن واحد نفسك توصف له
إحساسك لمّا يكون جنبك
و تقول له مساحة الشوق اللي في قلبك
تتقاس إزاي !!!
و في روحك صوت لحنين رغّاي
عن واحد واحشك بزيادة
مع واحد شاي
تتقاسمه معاه
وإنتوا بتتبادلوا كلام متعاد
زي السؤالات عن أخباره ؟
فيرد يقول : أهو كله تمام
أخبار الوالد و الوالدة ؟
آااااااه برضه تمام !!
تأثير الحَر على نشاطك ؟
أهي ماشية إنما طبعاً كسلان
دا العادي و هوّ ده حال الصيف !
بتشيّش لسّه مع اصحابك ؟
يعني على خفيف ....
شُغلك و مكانك ؟
غيّرته ......
مرتاح دلوقت ؟؟
بأتقلم يعني و ماشي الحال !!
و سؤال بسؤال
و كلام إتقال
إنما و لا قال إنك واحشه
و لا حتى لسانك قالها له !!
عن واحد كان شاغلك حالُه
ميّل على قلبه حنينك مال !!!
::
منى حواس
" من وحي اللحظة "
وبااشرب دمعتي سادة
كما العادة
على الضحكة اللي متعادة
في حضن الوحدة بااتقلِّب
مع التفاصيل !!
أنا والليل ....
قصايد بور
بنحكي حلمنا ف سطور
ويكشف دمعنا المستور
فتنهش جسمنا الأشواق
فراق بفراق
ودمعي فاق
حدود الحرف
وممنوع اللقا م الصرف
أنا اللي تملِّي أحلامي
في آخر صف
وأنا اللي إنْ خف يوم
وجعي ....
با اوارب دمعي واستّناه
ماانا عارفاه
ها ياخد لفّة ويجيني
يكمّل دايرته في قلبي
ويفتل حبل أيامي
بساقية دمع فلتانة
غاويها اللف !!!
::
منى حواس
تعرف......
إحساسي الليلة
غريب فعلا
وكأني لأول مرة بااحس
وكأني لأول مرة بااشوف
إحساس مكسوف
مع إنه جرئ
بيتوه م الخوف
رغم إنه برئ
وكأني غريق
متعلق فيك وإنت القشّة
وكأنك عشّة وقلبي الطير
لو تعمل خير
خلّيك جنبي
خلّيني في قلبك
طول الليل !!!
::
منى حواس
" من وحي اللحظة "
واحشني بجد
والشوق في القلب إن فاق الحد
بيكون الحد الفاصل بينّا
دموع و آهات
وفي قلبي حاجات
لو تتوزّع....
بين دقة قلب الكون السارح جوايا
والنبض الساكن في الحكايات
تلقى الدقات .....
مزروعة بنات
بملامح حور
والروح بنّور
بيضوّي في قلبك
يرسم ضي !!!
و اكمنك ساكن أشعاري
فبنات الحي
بتغير مني
وتملّي يقولوا إنك مش جاي
و يادوبك أغمّض عيني عليك
ألاقيك ......
بتمد في أول خطوة بوح
فترُد الروح
من غربتها
والضحكة تراود سكّتها
عن آخر أحلام الدنيا
فاضحك من قلبي لأحلامك !!!
::
منى حواس
" من وحي اللحظة "
(١)
أمي الضحكة الصافية
الدافية الشافية
من الأوجاع
قلب يساع
كل الكون ولا عمره يمل
أمي الضل
ونور الشمس
هي الأمس وبكرة وبعده
أمي وبس
قلبي إنْ يصرخ
قبل ما ينطق
هيّ تحس !!!
............
(٢)
تتبعتر وتلف الدنيا
وبترجع ما يلمّك غيرها
كتّر خيرها
شالت ... تعبت
صبرت.... ربّت
تيجى عليها كتير مابتقسى
وان عدّت من يم جبينك
طيرة في مرة وطرفت عينك
م الطرفة عيونك بتدّمع
تنزف هي الدمع الغالي
وإلا عيالي.....
يارب افديهم بيّا ماتوجع
قلبي عليهم يوم في العمر
تشرب مُر.......
وتعصر لينا حلاوة روحها
في عز جروحها
تطيّب فينا
حتى حياتها ماتغلى علينا
وإن مرّت بخاطرها ف مرّة
فكرة إنّنا ممكن نتعب
قلبها يصرخ : بعد الشر
...............
(٣)
أمى الساقية الدايرة بروحها
تروى في عمرنا لاجلٍ يطرح
أمى البيت والغيط والمطرح
قلبها مسرح......
على خشبة أيامها اتلعبت
م الدنيا كل الأدوار
قلبها دار......
بيرد الغايب م التوهة
ويشق من العتمة نهار
كل كلام الدنيا مايقدر
يوصف حتة صغيّرة فيها
ولا يكفيها.....
أمى الرحمة
الموصولة بحبل الله
طول ما الأم في وش الدنيا
تبقي عمار......
أمى حياة !!!!
؛:
منى حواس
" رسالة عن أمي "
من ديوان : " مجرد حلم "
(1)
أبويا العزيز
تخيّل.....
ملامحك بتسكن وريدي
تفكّرني دايماً بكل اللي فات
باشوفك في ضحكى
واشوفك بتبكي
وأشوفك كلامي
وأشوفك سُكات
تصوّر.....
بحبّك في كل الحالات
..............
(2)
أبويا المسافر
في ضلعي وساكن
باشوفك معايا في كل الأماكن
تجي لي وأروح لك
تروح لي وأجى لك
وكنت امّا باتعب
تشيلني....
وأشيلك....
ووقت المواجع
يقوّيني حيلك
بتقسى عليّ ساعات امّا باغلط
وقلبك يدمّع عشاني ساعات
تصوّر بحبّك في كل الحالات!!
.................
(3)
أبويا اللي فاضل
من الذكريات ....
في ودني كلامك
وياما حكايات
حكيتْ لي عليها ف صُغري
وفات....
غُناك استخبّى في لحن الوريد
وكنت امّا باسمع كلامك باقول
وكُلّى براءة :
ياريتك تعيدْ....
ياأبويا اللي فاضل من الذكريات
تصوّر.....
بحبك في كل الحالات
.............
(4)
عجيب النهاردة كلامك معايا
عجيب انت كُلّك
كأنك نويت
تسيب الحاجات
تلملم قلوعك
وتفرد ضلوعك
تقدّف مراكبك
لمطرح ما جات
.............
(5)
أبويا الحبيب
بلاش الهزار ده
أكيد إنت فاهم
دموعي النهاردة
عشان نفسي تقعد
معانا شوية
وحتي تطمّن
ضلوعك عليّ
تسلمّني مثلاً لإيد الخليفة
فيتوصّى بيّ
واجيب لك عيالي
فيحضنها كفّك
وتلعب معاها
وترسم خُطاها
ويتملّوا حُضنك
..............
(6)
طب اقعد معانا
ووعد امّا هااغلط
هاكسّر عضامي
عشان إنت طيّب
ما تعرفش تضرب
دا أخرك بتزعل
شوية فَتسكُت
وحتى ف سكوتك
باحب السُكات
ها تقعد شوّية ؟
يا أبويا اللي عمره
ما كسّر لي كلمة
تصوّر....
بحبّك في كل الحالات
::
منى حواس
" رسالة لأبويا "
من ديوان : " مجرد حلم "
تعرف......
كان نفِسي الصبح
أكون ويّاك
مع أول تكبيرة
ف صلاة العيد
كان نفسي عينيا
تكون حاضناك
ما علينا.......
طمِّني عليك
إيه أخبار العيد ويّاك
الاحسن عيدنا ولاّ هناك؟!!!
عارفاك
عطّرت هدومك م النجمة
وأنا عارفة النجمة اللي مواعداك
بس أنا زعلانة.....
إزاى تنساني ف ليلة عيد؟!!!
فاكر حكاوينا ف ضي الليل
عن بُكرة المليان باللحمة؟!!!
والحتّة اللي هاخدها زيادة
كان قلبك وبرغم الزحمة
سايع كل الناس بالعدل
على فكرة بعادك مش سهل
طب قضّيت الليل إزاى؟
لسّاك رغّاي؟!!!!
ولاّ نسيت حكاوينا كمان؟
لسّاك إنسان؟!!!!
ولاّ بقيت ف الجنّة ملاك؟!!!!
فاكراك......
كان مكتوب على كفّة عُمرك
" من أهل الجنّة"
كنت باشم ريحتها ف إيدك
كان مكتوب على كف الإيد:
" صابُه الدور وهيبقي شهيد"
فاشفعلي.........
وأوّل ماتجيلك جواباتى
ابعتلي.......
هستني رسالتك توصفلي
ياشهيد:
ف الجنّة......
إيه شكل العيد؟!!!!!
::
منى حواس
إيه شكل العيد ؟؟؟
من ديوان : "مجرد حلم "
واخر 3 قصايد من ديوان مجرد حلم الصادر عن الهيئة العامة للكتاب في مايو 2015
ليست هناك تعليقات:
إرسال تعليق