نام يارفيقى وتارك جى
مِد شوية يا "عب موجود"
مالك ماشى تقدم خطوة وترجع ستة
سَرع حبة ...أصل القطر الحربى يفوتنا
تبقى مصيبة ومُشكل لينا
أمك حطت ليك الجبنة ف قلب الشنطة ؟
أصل دى جبنة أمك زينة
لازم أول لما هنوصل.آخد منك طبعا حتة
ليا وأفرق ع الرجالة
شوفتها واقفة تبص عليك
هى وأخوك الواد "درديرى"
وأما شافتنى معدى عليها ب لبسى الميرى
بصت ليا وقالت يابنى "تيجوا يارب ب ألف سلامة"
وأنا رديت وب أشاور ليها "إوعى تبطلى دعوة ياخالة"
أصل ورب الكعبة ياخالة أسيبه هناك
ضحكت برده بكل براءة وقالت ماشى
ربى يخليك ليها ياصاحبى..أمك دى والنعمة ملاك
لكن بص بجد ياعبده...قبل مانركب يعنى القطر ..
دورى أنام جنب الشباك....
"إوعى تحمرق ولا تطلع غلبك فينا"
كانت آخر جملة مابينا...قبل ليلتها ما نوصل "سينا"
وأما وصلنا ...دخل الوحدة وكان مهموم
أول مرة ب أشوفه مكسل ليه مش عارف
كنت مفكر إنه أكيد همدان م اليوم
لكن عمر ماجالى الهاتف ...
إن دى آخر مرة هأشوفه
وإن دى آخر ليلة معاه
وإما صحينا ف عز النوم
علشان ندى طابورنا تمام
كان متدربك من جواه
وماهوش عارف بيروح فين
وأما طلعنا الصبح كمين
كان متجنب كل الناس
واخد نفسه وقاعد وحده
طلع صورة "فاطمة "خطيبته
وأما لقيته صحيح سرحان
قولت بلاش أقطع تسابيحه و..قمت رجعت يومها وسيبته
حبة وهاتك ضرب رصاص
قبل ما يرموا علينا قنابل
حبة وهاتك ف التفجير
كنا كتير
بس الموت مالهوش بالكترة
ولا هى خناقة وحتة علقة........!!!
وقبل مايلبس عبده "السترة"
نابه ف سدره حداشر طلقة
مت يا صاحبى .......؟
مت ومات الضحك معاك
طيب هرجع لأمك كِيف...؟
اللى تملى بتسناك
هرجع شايلك ميت ليها........!!؟
وإحنا يادوبك كنا هناك.......!!!
نام يارفيقى وتارك جى....لا أنا هنساهم ولا هنساك
ليست هناك تعليقات:
إرسال تعليق