هاكون وطن لل ( واو )
و خيمة خضرة عفية
تنده على التايهين
ندهة شبع و أمان
و ابدأ ب ( واو ) بكرة
حنين يلاقى حنين
فى مبتدا المسافات
لعيون وطن عطشان
لقا عيون عاشقين
و اقسم بريحة تراب
فى الروح مدد راحة
فى القلب عزف رباب
لاكون بساط ساحة
للنصر يوم العيد
و اصاحبها فجر سعيد
بضحكة المواعيد
و اكون لحالها سكن
منصوب على كفها
اشرب حروفها نيل
و اعزفها وِرد نبيل
و وردة فى المواويل
و لما يجى الليل
أحضنها و اتدفا
يا فرحة البساتين
لما الزمان وفّى
و فتح كتاب بكرة
حرية للجايين
افتح يا حلم عنيك
و اسمع غنا الياسمين
ليست هناك تعليقات:
إرسال تعليق