محكمة
الشاعرة / كريمة ثابت
تبّدل ملهمة بملهمة
تقف على باب الغنا
تدبح قلوب كيف الخروف
وتعبّي بالدمّ الحروف
تكَمَل قصيدة ملحمة!
الناس تسقّف
والجماهير تعيّييييط
والبنات تسيّح روحها
تتقطع على السكة الخطا
ف خطوط وجع مبهمة
يا شاعر الشعرا
أمير المكلمة
فاكر قصيدتك دي لمين؟
ولا الغنا ده كان في مين؟
ولا البكا ده كان منين؟
كل الحروف اللي انت زيفت انفعالها
وافتريت على طهرها
لبستها وشوش الملايكة الطيبين
واقفين قصادك
ناصبين لروحك محكمة
احلف يمينك مش حروف
ادبح قصيدة
واحلف على روحها
تقول الحق لو خوفك نما!
كان فين ضميرك مستخبي وقتها
كان لابس ايه صوت الديابة
وقت ما أسرت النعاج
بالعزف أو بالدندنة
وازاي سحرت النار ؟!
خليتها تشبه بلسمة
دلوقت فين هو قرينك؟
مستخبي ف وادي عبقر؟
والقصيدة ف جعبته
حيّة تعتّق لدغها؟
وانت وحيد
واقف بتحجل رقصتك تاهت
ومش عارف توقّع خطوتك
على لحن خايف
وسط صحرا ملغمّة؟!
احلف يا شاعر
إنك بريء
وانك ماكنت ف يوم جريء
وان القلوب
هيا اللي كانت كل ليلة تدق عالشباك
وترمي نفسها ف وسط الطريق!
علشان تدوسها بكلمتك!
وانك يا عيني مرتهن
على ضحكة الوجع الغريق
وان البحور اللي نزفها ف يوم غناك
دي طقس كوني
مش جريرة لحضرتك!
وان الزلازل مش بفعل محبتك
وانك يا دوب دمية ف إيد هذا القدر !
وانك ضحية مش كمين
وانك ف غنوايتك سجين
احلف
وغمض عينك استنى الحَكَم
دلوقت ينطق حكمته
م
ح
ك
م
ة
.
.
.
.
.
.
كريمة ثابت
ليست هناك تعليقات:
إرسال تعليق