سنة أولى غربة .. قصيدة للشاعر سيد لطفي

سنة أولى غربة

الشاعر / سيد لطفي

سنة أولى غربة وريحة مصر ف دموعي حنين وخصام بنتبعتر على المطارات ونتغرب من أول كلمة في سطرك قليل الحيلة والموال أشوف دمعك من الطيارة مارجعشي أشوف صورتك وأنا طاير أدوب م الشوق سيبوني للي سجناني وسكناني وبايعاني *** بتشحت ضحكة الصبيان ورقص بناتها ساعة تفتكر قلبي وأنا باحبي على دمعي واضمك بين رموش عيني ف كلمة ونص باكتب لك وحشتيني *** وأقول لك إيه ؟ وأنا واخد على خاطري يا أحلى ما ف قدر قدري حرام يعني إني أطول اللقمة بالساهل وما اركعشي وأبوس الأرض للواطي وللخاين وللي من صلاة الفجر نازل نهش في عرضك وأنا شايف بلاد الله صبايا ف قصرك المسروق يا ست الحسن *** سكتي ليه ؟ وسايبانا نضيع منك دقايق عمرنا تسرسب نموت م الخوف وم الحيرة ما هو انتي لا عاجزة ولا قادرة تضمينا وصورتك رغم ما فيكي لفين ما نروح بنهواها عشقناها وبرضو لسه عاشقينك عشقناكي برغم الذلة والنكران وشوفناكي على هدومنا اللي شقيانة وف وشوش الصحاب والناس ف دقات القلوب البكر حتى ف ضحكة الخناس بنلقاكي نشوف صورتك *** لا عارفك ضاحكة أو باكية لا عارفك ناسية أو فاكرة عشان عودك كما مسلات جدود أهلي يبان مصلوب برغم إن ف إديكي دم بينقط صحاب لينا عماد عفت وبسيوني وعم أحمد حضن مينا ينقط ع التراب يخضر أبحلق ف الخضار إنتي أدقق ف النهار والليل يكون طيفك *** لإمتى هاتفضلي ساكتة ؟ مانيش عارف لإمتى تفرطي فينا ؟ مانيش عارف وحتى القبلة مش عارف تكون إزاي مدام سجادتي مش مفروشة في حضنك وأصلي لمين وفين هو ؟ وليه سايبك نهيبة لكل هب ودب بهدمة تخزي أمجادنا تعرينا يكون زعلان ؟ ويزعل ليه ؟ دا هو اللي بعت جبريل يوصي الخلق خشوها إذا عوزتوا الأمان فيها إذا عوزتوا الحنان فيها وحتى الحب متبعتر ف حواريها ف بنت بشعرها السايح وعيل من حليب الفجر متوضي يصلي ركعتين للحسن يكنس قبلة العشاق يونس قلبه بالنظرة يهونها على الغلبان بكلمة تجرح الرقة ف خد الورد يضحك لما تتعاكس نشوف بكرة اللي جاي أحلى فيضحك ضحكة من قلبه مسيرها بكرة تتعدل ونعمل أي شيئ يرضيك *** أمانة بس يا ستي وست الناس وتاج راسي إذا جالك ف يوم جبريل وقال لك ربنا زعلان قولي له سماح عشان خاطري 15 /3 / 2013 فندق ماريوت الراية الكويت الشقيق