لوحة
رسمت بحر على الورق
ورسمت فيه
مركب ...
وسنارة ...
وشراع ...
ورسمت بكرة
اللى جاى من خرم إبرة
بطول...
وعرض...
واتساع ...
الحلم فى عيون الجياع
قـُفــِّة سمك!!
فرسمت لى قُفة
و مليتها بكل أنواع السمك
البحر فاض
بلّ الورق
شهق القلم.. من دهشته
شرق الأمل.. وف شرقته
حبة لآلئ زغللوا فى القاع
دهب .. ياقوت .. مرجان
أفرح قوى
واصطاد كمان
وارسم ...كمان
و ارسم كمنجة
وعود...
وناى...
وارسم لى فارس بالحصان
خلص القلم منى
ما بين بحر وسما
بطلت أحلم مرغمة
وما كانش فاصل بينى فى اللوحة
وبين ريقى اللى ناشف م التمنى
غير بس إنّى ....
أقاوم ضربة الموجة
وإحساس الغرق...!
ليست هناك تعليقات:
إرسال تعليق