يا اللي انت مهتم بكياني
ومزعلك طعم البعاد
من أمتى يعني يا روحي كنا قريبين
ولا الفراق زودلنا طعم الحنين
فرجعنا تاني بقلبنا نحب الحياه
كان حلمي اكون وياك سعيد
وحلمك انت في الفراق
أيه رجعك تاني تغرد باشتياق
وتهزني ف بحر الغرق
فاادوخ واقع في الحزن تاني
وتشدّني التوهه معاك
وتدوب في جسمي وادمنك
دمي هرب وياك في مره
وخلى قلبي يبتدي
شحات فقير ع الارصفه
بيمد ايده ف كون براح
علشان مايلقى لقمته
ويبني ليك مقام كبير
درويش وحابب طلتك
وبيجعلك
بين ربنا وبينه وسيط
بس انت كنت بتسمعّه بودن الغرور
مش هو ده مقام القمر
اللي ابتدا في العشق حراق للقلوب
زي الجراد في الارض ينهش م القلوب
حبة خَضاره وفرحته
وعاوزني تاني أبتدي وياك وجع
هو انت يعني لذتك
اني اكون مجروح ومش لاقي الدوا
يا قسوتك
دانا لسه ببدء دنيتي
وانا كلي دم من الجروح
ارجوك تروح
وتسبني اعيشلي ف الحياه
ليست هناك تعليقات:
إرسال تعليق