حلاوة زمان
عروسه وحصان
* * *
ياما كان نفسي ف حصان
أخطف الحلم اللي باقي
أحلمه يوم التلاقي
والعروسه بنت بلدي
ب خد وردي
شايله همي
دمها يشبه لدمي
ع الظروف صابره وساكته
حلمها محبوس ف محبس
العريس ايده قصيره
حتى عينه مش بصيره
من سنين ساقط فريسه
جوه بير مافيا الحياه
لو يلاقي حتى أوضه
لو هيفرشها حصيره
كان قدر بالحب بينهم
ينتهي حبس العروسه
العريس ميت ف قهره
عمره راح ومجبش مهره
والحصان مش لاقي فارس
الغريب احتل ضهره
للأسف مفهمش قوله
صال وجال وكسر غروره
الحصان أصله أصيل
عربي حر وكله خير
والعروسه مهمهاش
راضيه بيه وعجبها فقره
حالفه توهب له حياتها
لو تعيش م العمر يوم
بس فين هيه العروسه
الحصان فك اللجام
الفوارس فجأه ظهروا
فجروا النور ف الميدان
يهتفوا باسم العروسه
الكل قام
بالاراده والعزيمه
من جديد مسكوا اللجام
ليست هناك تعليقات:
إرسال تعليق