طب قولى ليه .... أسامة الخياط

طب قولى ليه
كل اختياراتك موشومه
بختم الحزن
وليه بسمتك
بتطل بالعافيه
مع ان غمازتين صدو
على خدودك
حتى الرموش
مالت على عودك
حاولت اغنيلك
ومسمعتيش
جربت اشرحلك
ومفهمتيش
وكان ردك مع صمتك
يقولى مفيش
ازاى اعيش وانا تايه
فى مشوارك
وانا الشاهد
على الماضى واحزانك
وكنت اتلقى
فى دموعك
على كفى
واشيل حزنك
على سنينى
وما تكفّى
وازرعها ف سنين قدام
كأنى حعيش
معظم الايام
مقررتش
البس سواد عينى
لا بالعكس
قررت البس خضار عينك
فى لحظه
لبستى فيها بارادتك
توب الرحيل
ومقدرتش
حتى المسك
وأطيع شفتين
على جبينك
عشان كل اختياراتك
موشومه تحت الوجع
رغم انى وشوشت الودع
وانتى النهارده فى اختبار
انك تكونى ومتكونيش
يغنيلك ويدعيلك

الخياط