غنوة للموت بشويش .... محمد حميدة

غنوة للموت بشويش 
...........

غنيتك
والقلب بيبكي 
وبنيت لك ف القلب مقام
أنا أول من سمى بإسمك
وأنا أخر من ألقى سلام
غنيتك
غنيتك وفـ حضرة ذكر
غنوكي معايا الدراويش
وملامحك ف قلوبنا البكر
بتعافر لكن بشويش
غنيتك للخوف ما يجيش
غنيتك
غنيتك كل الملكوت
وعيون عطشانة لضحكاية
ورسمتك حيطان وبيوت
ضميتي الأحلام جوايا
انا أول من صلى ف ريحك
ودعالك مع كل أدان
وتملي بكون من مجاريحك
مع ذلك بفضل إنسان
غنيك
غنيتك طول المشوار
وداويت الأوجاع بحروفك
لو أمن بحرك غدار
فـ أنا خايف أكتر من خوفك
غنيتك
غنيتك ف غيطان ونخيل
فلاحه بتصحي الفجرية
وبتغسل شعرها ع النيل
وبتسقي البساتين حنية
غنيتك
غنيتك وأنا أخر ضحكة
على أرضك بتموت بشووووويش

.......
محمد حميدة