ما تلبسيش روحي كده
على فكره ممكن تخرجي مني ببساطه أوي
قومي افتحي الدواليب
و لمي فساتينِك
سيبي البلوزه الحمرا
علبال ما اشيل منها آثار صوابعي
و اخيطلك زرار انقطع
و انتي بتشدي نفسك مني ف هزارنا الأخير
و ضحكتك متشعلقه ف النجفه
و لسه لحد دلوقتي مش عارفه ترجعلك
إتسحبي براحه
و انا مش حاخد بالي من خطواتك
ممكن اعمل نفسي نايم
أو قلبي يشبط ف مزيكا بحبها
فادخل ف غيبوبه لحد ما تعدي
و ممكن استسلم لحالة سُكر مثلا
مع صوت " ياسين التهامي "
أو انشغل بقراية قصيده طويله
أي قصيده يعني
ها ... إتسحبي يلا
مبحبش لحظات الوداع
لو حتى مش حنسلم على بعض
عدي من 1 ل 10
و........
و ادخلي أكتر ف حضني
ليست هناك تعليقات:
إرسال تعليق