طاطي
ريهام الجنزوري
ريهام الجنزوري
طاطى و ادي الروح أمانها
أصل دا ما بقاش زمانها
أصل دا زمن الصوابع
كل حوت بقى ليه مخالب
ينكشف لو يوم هجرها
دق طبل الخوف فـ قلبي
مالت الأحزان إليه
عقل إيه دا اللي انت ..
جايني وبتناديه
عقلي بعته زمان لتاجر
قال لي ..
شوف..
العقل زينة ..
واللي زيي وزيك انت
يعوذوا إيه ..
غير لقمة بايتة..
وهدمة شايطة..
وجوع حنين
ركن لما الليل يليل
يخفى لما الشمس تطلع
قولت ..إيه الفايده منك
طب ما أبيعك..
حتى ألاقي رغيف ونومة
بصلي التاجر وقال لي ..
ياللا ما تفكرش ياما
عقل إيه دا اللي مخاويك
شوف عيالك واللي بيك
مد أيده قوام وقال لي..
هات أيديك
قولته طب فيه كمان ..
شيء يلزمك
كومته يوم هنا في الزبالة
ومن سنين ما فتحتله
ودخلنا جوه الصمت حبة..
مسهمين
لما التقاني بمد أيدي..
في السنين
وأديله لفه مربطه ومتربة
فكك معايا لفة العمر الطويل
ولما فك حبال الصمت
من فوق الضمير
قولت له استنيت كتير
لجل أما أشوف حريتي
في أيدين أسير
وساعتها حس إن الضمير ..
حي فـ مماته
فـ بسرعة لف اللفة من تاني
وزود سكاته
مستني مني عروض جديدة
وأتفرد عوده اللي كان ..
مكسور قصادي..
وقال لي فاضل إيه كمان
قولت فاضل إني اكتم ..
جوه منى الصوت وبس
قال لي لا فاضل كمان ..
انك تـ طاطي
طاطي وأدى الروح أمانها
أصل دا ما بقاش زمانها
طاطي وأدى الروح أمانها
أصل دا ما بقاش زمانها
ليست هناك تعليقات:
إرسال تعليق