<
مش طايقه كلام
مش لاقى مطارح جواياه
علشان أسمع
حواديت بتجيلى فى كوابيسها
أشكال ...من بنى ادمين باهته
تفاصيلهم بتفارق روحى
فطرحت سؤال
علشان اقعد واسمع وارتاح
وشوشه الرمل على ودانى
وانا باجرى على الشط ضفاير
مفكوكه آخرها من المشوار
حواديت تانيه
بتضم ف خوفى
قبل اما اموت
مش طايقه كلام
:::::::::::::::::::::::::::::::::::::
الضل عليك
بيمد فى نفسه الجوانى
سخونة شمسك
لجل اما يبرهرنلك صدقه
لما بتفرك إيدك م البرد
... فيحاول وشوشوتك فى دفاه
شجره بتتونس بالعصافير
تتمد عينيك
نظرة بريئه
لساعات الضل الباقيه عليك
تكتب فى قصيدة بدون عنوان
وتسيب إحساسك على راحته
فتلاقى جواب
يبعت لقصيدتك بر جديد
على باب بيتك
من غير ماتحس
:::::::::::::::::::::::::::
إزاى أسكت
واعشق علامات ترميز للوهم
أنا شايفه الدنيا بتتغير
هو صحيح الحلم صغير
مابيلحقش يشوفنا كبار
بس انا جواياه
ضمير الكون
ف سماه فضفضتى
ومطره هاتحضن قلب الأرض
عشان تصاحبنا
ونتونس تانى
من غير علامات ترميز للوهم
دلوقتى خلاص
ماقدرش اسكت
:::::::::::::::::::::::::::::::::::::::::
تعرف انك فاضى جداً
تعرف انى مش باشوفك
الا فى قلب التراب
-ايوه عارف
-عارف انك مش قريبه لهمستى
-وان القمر مابقاش يبات حواديت
-وان اننا وانتى
- مظاهره مابتدش
-رغم إننا
-ياما انضربنا
-واحنا بنلم الرصاص
لما انت عارف كل دا طب جى ليه
-قلبى اللى جابنى من بعيد
-شايل الحلم اللى فاضل
-آخر رصاصه ضمتيها
-ومنتظر حكمك عليه
::::::::::::::::::::::::::::::::::::::::::::
الشمس بصه م الشبابيك
فلسعت وشنا
قبل اما نرسمها
إبتسامة صباح الخير
نطلع ع الطريق
نجرى ونبتدى نحلم
فيبدأ حلمنا طرحه
فى كلام حواديت
نسرح نغيب
ننهج أوى
رغم اننا قاعدين مطارحنا
يمكن عشان
الخوف كوانا م الشبابيك
دمع بينزل
أنينه ف دمنا
قالنا ف صوت الشماته
مين نكون
تاهت إجابة
الشمس تفسير للعقول
نستنى إيه تانى
م الشبابيك
واحنا اللى موتنا
أجنه ف البطون
::::::::::::::::::::::::::::::::::::::::::::::::::::
لحظة غياب الوعى برد وشتا
ماخدشى الأرض بالأحضان
زعلان ليه يابشر
على خطوتك
خايف يكون
شكل التراب مغشوش
خايف يكون جواك ماطمنهوش
إن لسه الدنيا خير
إننا قادرين نعيش
رغم الدموع
فيضان عفى
غرق بيوت
مافضلشى منها
غير يادوب شباك قديم
إزازه فى حاله انكسار
من شرخنا
على كل أكره
مسكها دمنا
بطل ياحزنى
سوء الظن من بدرى
يمكن ينكسف منى
كل اللى فات
بين شرودى
وبين غياب الوعى برد
بحلم ياخدنى
بين دفاه أحضان
:::::::::::::::::::::::::::::::::::::::::::::
الرقص ع الأوجاع
تحديث لموضه عجيب
علشان يناسب
عصر مليان باختراع
نوع م البشر
غاوى موضه وفبركه
أخرتها إيه
على عقل محبوس فترينات
لو جيت فى يوم ولمستها
هاتكهربك
أوجاع جديده
بتعترف بالإختراع
::::::::::::::::::::::::::::::
دراويش ناعمه
وقاسيه ف نفس الوقت علينا قرار
واحنا اللى زمان كنا الأحرار
ولا عرفت روحنا طريق الشك
دلوقتى بقينا نخاف
من كف ايدنا
ليكون بياخدنا نشيل الخوف
والحمل تقيل
وضلوع مابقتشى بتستحمل
قسوة رحله
ياه ع الرحله وياااااااااه ع المسافات
والخطوه المشقوقه الدايبه
ف بكرا القلقان
من دراويش ناعمه
وقاسيه ف نفس الوقت علينا قرا
ليست هناك تعليقات:
إرسال تعليق