الدكاكين
=========================
من امتى وقلبك نسّاى ؟!!!
مش اول مرّة اوصفلك عنوانى وماتجيش
ايه
مش بنهف عليك ؟
مابتشتاقش لحضن اللمّة ؟
لريحة الضحكة وبُق الشاى !!
ولا خلاص العمر مكركب فيك
مابقاش ف جرابك ولا خطاويك
غير هَمّ وطحنة آكل العيش
الله يخليك ..
بحق امى اللى كنّا بنقسم سدرها
ماتخدّل كتاف عشمى اكتر من كده
وعموما
عنوانى ما يتوّهش
نفس الوشوش والبنى آدمين
القلوب اللى بترفع بيبانها الصبح زقّة أمل
وف اخر الليل بتنزلها ايدين الحمد
هزّيت ف دماغك يابن الناس وضحكت
يبقى عرفت
مانا قلت انك مش محتاج لدليل
وعشان اقفل باب الحِجّة عليك
على ناصية اول بيت هتلاقى سبيل
ف ريحُة يادوب بما فيش
سيدة ..
بياعة العيش
صوتها لما تنادى ع الرغفين
يشبه تمطيعة بنوتة بتفوق م النوم
بنوتة ف شفايفها بواقى الحب اللى بتحلم بيه
اوعى تفكر تعاكسها
او تلمح ف عيونك نظرة طيش
سيدة ... على قد السحر اللى ماليها
اسمها ف الحتة ..
سيدة ياشاويش
كفتّها تطب قصاد ميت راجل
واخدة عيالها تحت جناحها
بعد ما جوزها اتنيّل خاب
واتّاخد .. بحشيش
هتسيب سيدة بيادوب مترين
هتلاقى ف وشك عم امين
ساعة ما يعلّى الصوت ع " الحصرى "
اعرف ان ما باعش عصير
إلا بسبعة تمانية جنية
وانا اخر مرّة معدى عليه
جرجرت معاه
ماتقولى يا عم امين بصراحة
ايه حكاية القرأن وياك ؟
مرّة الحصرى !!
مرّة البنّا !!
عشمان ف الجنّة ؟
يبقى انت اكيد ماقريتش العقد
ف قولى ان كان عقلك بيوزّك
انا اولى تقولها على ايديا
رد علىّ وهو مسخسخ
_ بصراحة
اصل انا بستغرب من ناس
قال ايه
تقرف تشترى من مسيحين !!
جنب امين
دكان لسة بيتوضّب
مشهور ف الشارع بعتبته الفقر
فى يادوب سنتين
عطور
مطعم
عجلاتى
صاحبة فلاتى بتاع كوباية وراجل منجوس
حتى اسأل صابرين القاعدة بنصبة شاى على باب السوق
واللى كفوف شبشبها
فاتحه له دماغة من شهرين
الحيط ف الحيط
دكان مقفول
الله يرحمة عمك عزوز
كان اطيب راجل ف الشارع كله
من يوم ما وعيت ع الدنيا وشفته
ما فيش ولا مرّة كان بيسلّم
إلا وياخد روحى ف ضلة
يطبطب على كتفى وهو بيضحك
ويقول لى .. سلّم على ابوك
من يوم ما مراته خطفها الموت
وسابتة ف الدنيا لا واد ولا بت
مارضيش يتعرى قدام ست
هتقابلك يافطة كئيبة بعد بيتين
مش باين منها اى حروف
وكأنها ممسوحة كسوف
بس هتعرفها اكيد
م الفارشين ع الارض وقاعدين
م اللى قلوبهم قناديل
حكاويهم مواويل
وغناهم ..
وصفة تحنن اعتى قلوب
مش منتظرين من غير الله
غير هى قروش باعتاها حكومة تدارى قباحة الفقر
ساعة ماتعدى ..
ابقى ارمى سلامك وانت بتضحك
وان حد ندهلك
ف ده بس عشان ها يرد سلامك
فاوعى ترد ايديه
قبل ما انسى و افوتك فى الكلام
الميه بتطلع عندى بخلع الضرس
لو ناوى تجدد ف وضوئك او فايتك فرض
او تسمع درس
فا دخل ع الزاوية
قدامها خيّاط بلدى وقفاطين
دكانه بابها قديم على طول متّرّب
وصاحبها روحة ف مناخيرة
بيضيّع وقتة مابين
ضَربُة ف أى عيال تلعب قدامة
وسَبة للايام اللى اتشقلب فيها الحال
طول النهار كوباية الشاى
والشيشة القص
ما هو فين على ما يشد مازورة
او تسمع صوت لمقص
مافيش شبرين هاتخطيهم
الا وهتشوف بعنيك العكس
عمك سعد
عمرك شفت الدنيا بتتناطح بكيسين مناديل ؟!!
حبّة أرواح ؟
مشطين كبريت ؟
عمك سعد !!
لا صوفى ولا متدروش ولا ليه كرامات
مافيش ف لسانه غير ذكر الله
عمر الضحكة مافارقت وشة
ساعة ما بحس بخنقة
بقعد وياه
عمدانة وسندة بعد المولى
بنت وواد
جابهم بعد ما شعرة ابيض
عمك سعد
زى كتير م الخلق
مش ممكن تفهم عايشين ازاى
ناس
برّة الحسبه
برّة القوانين
ولو فكرت ف يوم تفهم
عقلك هيشت
علشان ترتاح
خرّجهم م الحسبة وم القوانين
عمرك شفت الدنيا بتتناطح ..
بكيسين مناديل !!!!!
لتالت مرّة تبص ف ساعتك
مالك ؟
عينيك مرغرغة بالكلام
وبتلمع بالحنين
شارد منى وسارح فين
سيدة ؟
سعد ؟
ولا عم امين
ولا عيالك
والقرشين اللى خايف يتخصموا اخر الشهر
خلاص ياصاحبى مافضلش كتير
همّا تنين
مديحة ..
ودى بت زى الدهب
بتأجر فساتين افراح
بتعافر على قد ما تقدر
بس الِحمل تقيل
والهم اكتر
ورثت عن ابوها
عيل منغولى
وايجار متأخر
وام ... نظرها اتحاش من ست سنين
فمديحه عاشت احلامها مع الفساتين
اللى بتلبسهم فستان فستان
وهى بترقص على ضى دموعها
واغانى حليم
ما فيش ولا مرّة اقصدها ف حاجة
إلا لما لاقيها ف كتفى
وواقفة معايا
شفت محمد افندى ف فيلم الارض ؟
اصل انا ف عينيها محمد افندى
ماتعرف ليه
لازق فيه دكان
هتموت م الضحك من العنوان
البودى جارد لدنيا الاكفان
مستغرب ليه ؟
م الاكفان ولا العنوان
ولا علشان جنب الفساتين
اهى سُترة و ليها ميعاد و آوان
سبحان مَن أبكى ومَن أضحك
ولا انت جبان بتخاف م الموت ؟
ما علينا
سعيد
ساكن ويايا ف نفس البيت
كان بودى جارد
قبل ما يخسر عينه ف علقة ويبقى كفيف
مراتة ...
كوافيرة بس على خفيف
لكن مجنونة
مابيحللهاش تنشر قمصانها
غير وانا باصص م البلكونة
تنده لنسوان الشارع بعد الضهر
وتخيّل حبة نسوان لما بتتلم
عاديك بقى ع اللى بيتقال
بيقولوا حاجات
بينقلهالى المنور بالتفصيل
طوّلت عليك ؟
بس بجد
اللى انت سمعتة ده كوم
والمنظر من بلكونتى ع الناس دى
كوم تانى
عالم تانى
هسيبك تسرح ويّاه
ويا سيجارتى الخامسة اللى بتحضنها صوابعك
سامع نهجان المية ف المواسير
يادوب أَملا ازازتين علشان الشرب
وأعلّق ع الشاى ....
وارجعلك
=============================
محمود عوده
