استعنا على الشقا بالله
الباب ما بقاش قادر يقفل خالص
بقى عامل زى الحامل وقت الوضع
بيصرخ ويدلدق كل مافيه
وانتى بتعافرى وتقفلى فيه وكل ما بتضغطى جامد يفتح
مليان كراكيب الروح
وانتى عماله تعافرى ترتبى فيه
فتخبيه بستارة ف مرة
ومرة ومرة
وهو مصمم انه يخرج كل المحشور فيه
ويواجهك---------------------------------------------------------------------------------------
بونكيووووووووووو
عمال بيعيط
تايه
بيدور على بيته النور
وعواصف
امطار
ونيران
وابوه بلعه الحوت الارض
ومات------------------------------------------------------------------------------------------------------------
ف قوضه متر ونص ف مترين
قاعدة
مع الصمت
وطول الوقت المر
وضجيج الأفكار والذكرى
يعنى هسميه ايه بالضبط
حب وراح؟
ذكرى؟
كان واحد شخبط على قلبك عدى
وبس
وانتى
قعدتى العمر بحالة
تفكى الخط-----------------------------------------------------------------------------------------------------------
رن جرس التليفون
فصحيت
طلعت مش المقصودة
صحيت
بصيت ف مرايتى
لقيتنى جبال تجاعيد---------------------------------------------------------------------------------------------------------------
الإيد مهزوزة ومرتعشة
فجأة القلب اتكرمش
اشتعلت الروح بالشيب
-----------------------------------------------------------------------------------------------------------------تخيل انك مش واثق ابدا ف حاجات
ولا واثق ف الناس
زعلان ؟
طيب تقدر تزعل من إيدك لما العكاز ادحرج منها فأمرتها
وصرخت
لما وقعت على الارض
وهى
وايدك بصت لك
والتزمت بالصمت------------------------------------------------------------------------------------------------------------
ييجى سبعتاشر خطوة وبس
علشان تقدر توصل للتلاجة وتشرب
سهلة
لكن
رجلك ما بتسمعش ----------------------------------------------------------------------------------------------------------------
الخوف
الفزع
المرض الوحش
بينهش روحى
ومش قادرة---------------------------------------------------------------------------------------------------------------
تمانين كيلو
غلبت
غلبت أجرب كل أنظمة الرجيم
وفشلت
فسامحنى
يااللى انا مش عارفاك
وانت شايلنى على اكتافك
وموصلنى القبر
--------------------------------------------------------------------------
كان أحلى وأمر قرار
لما قررت أعاقبك
ببعادى
وابعد عن اى مكان شايل سيرتك فيه
لاننا
لو
يعنى ف قلب العمر قابلتك
هخدك بالحضن
وهنتحول
تمثال
منحوت من حزن
ليست هناك تعليقات:
إرسال تعليق