يا ... مريم... للشاعر يسري توفيق اللباد

يا ... مريم
======
ويا مريم
انا لما اصلى راح أدعيلك
وها ارسم صورتك العذرا ..
فى منديلك
وها اقرالك ..
من الأناجيل مايحلالك
وصورلك ..
هلال وصليب
وها ابدر لك..
تقاوى الطيب
وأزمزم لك .
دموع عينى
تكون مغطس
ونخله طالعه من فلبى
عشان تطرح
وتكعيبه بطول النيل
وسهرايه ..
ل حد الفجر ما يأذن ..
ويمشى الليل
ف تلقينا طابور واحد
مينا واحمد
وديع وحسين
على الفرنه ..
نجيب العيش
وتمشى بينا أيامنا ..
ل حد الجيش
ف نتعاهد على حدودنا
ل حد يسهى ويصيبنا
ونقسم ..
م الجرايه رغيف
وف الخندق ..
ننام تكتيف
ل حد مانسمع الشنجى
يقوم مينا
يشيل فى غطاه يغطينا
وتخلص نوبة الحراس
ف نرجع ..
نزرع المادنه
ونربط ..
فى الحبال أجراس
و تمشى ..
بينا ايامنا
ونتشارك . فى احلامنا
ولا يدخل غريب بيننا
ونتكعمش من البرده ..
ونتكوم . ف تحت لحام
ونتجمع على اللقمه ..
ولو كات حاف
... ... ...
ويا مريم
اذا غنيت . ها اغنيلك
و اقيد لك ..
من صوابعى الشمع
و ازينلك فى اكليلك
واكمل لحن . مواويلك
ويا مريم ..
أنا صليت /
وبدعيلك