1
كسر وزن البيت جريمة
كسر قلب البنت عادي
الخطوط المستقيمة
مش دليل انك حيادي
2
سهل تسحب كارت شايب
ياخده منك حد تاني
سهل توجع حد غايب
بالسؤال عن حد تاني
3
رسم قلب في صفحة بيضا
مش دليل على حسن نية
رسم قلب في شاشة سودا
رسمة أكتر منطقية
4
كل ممكن عند واحد
كان لواحد مستحيل
لسه فيه ع الأرض واحد
سهل يخدع عزرائيل
.
.
1
إلتماس العُذر أصعب مـ الوقاحة
إختصام الرب أسهل مـ الإيمان
كل نقطة بنج بتفيد في الجراحة
كل حضن بيحتوي نسبة أمان
أي حد تكلمه فـ مرة بصراحة
صعب جداً تاني يجمعكم مكان
.
2
الهروب من شئ مواجهة
المواجهة ساعات مخاطرة
احتياجك و احتياجها
تبعدوا عن بعض فترة
أنت شاطر في ارتباكها
و فـ إجتذابك هي شاطرة
.
3
غُرفة الإنعاش وسيلة
للتمسُك بالحياه
المسافة المستحيلة
سهلة عكس الإتجاه
ليه نزلنا بذنب آدم
و إحنا ما قطمناش معاه .!
.
4
سنتي واحد في المسافة
يقلب النصر لهزيمة
حرف واحد زاد فـ سابلك
عاهة جوّاك مستديمة
الخطوط الحمرا أوضح
مـ الخطوط المستقيمة
.
5
أنت ذرّة و هي ذرّة
و انتوا لاتنين أكسجين
لسه فيه في الكون مجرّة
ما استبحهاش الروتين
السعادة ساعات مُضرّة
خاصةً للبالغين ..!!
.
.
ليست هناك تعليقات:
إرسال تعليق