من فضلكُم
أنا لسه حَيّ
إستَنُوا حبه لما اموت
أنا لسه فِيَّا الروح
عَمَّاله ترمح ف الحشا و الضل
إستنوا حتى لما تصعد للسما
و ابقوا افردوا جثتي على أي ترابيزه ف القهوه
و عَوَّروها بالوشايات الجميله
و ياريتكوا تاخدوا راحتكوا ع الآخر
بس بشوية نظام
يعني اللي متغاظ قوي مني
يرفع صُباعُه الأول
و يستأذن من اللي حيمسك القعده
و يرش بدني النحيف بفضيحه مش فِيَّا
و يا ريت تشوفوا حاجات جديده من اختراعكُم
ما باحبش التقليد
و انتوا عارفين الكلام ده
ليست هناك تعليقات:
إرسال تعليق