حلوة الليالي معاكِ على فكرة ..
و كل حاجه طعمها أحلى
حتى السجاير ..
طعمها .. مش طعمها
زي ما تقولي كدا حالة ونس
الكلام نفسُه حبيبتي طالع كدا
و كأن روحي أبلة الإملا ف سنة تانية ابتدائي ..
و بتمليني تفاصيلك
حلوة الليالي معاكِ على فكرة
حلوة أوي
كأن الليل بتاعي و الهوا مِلكي
و النجوم مسامير بتلمع ف شباك السرير
و القمر أباجورة ع الكومودينو جنبي
أنا ليه بحب تفاصيلي النهاردة كلها ..
و اعشقني بالشكل ده ؟
و ليه بانَفّض قلبي من كل الذنوب
و باقلع روحي ع العتبه
و باستعد بكُلي لخطيئتِك الطاهرة
_ أنا بعشقِك ..
ممكن تكون الكلمة يعني قديمة جدا ..
و كلاسيكيه أوي
و كل الناس قالوها كتييييير ..
من قبل ما يدونها حد بإسم " مياده " و " بليغ "
ممكن تكون الكلمة نطت من لسان ل لسان
و قلب لـقلب ..
و روح لـروح
لكنّي روحي بتختلف
_ أنا بعشقِك ..
سامعه ؟؟؟
حسيها مني كدا ..
مش بالذمة مختلفة ؟
حلوة الليالي معاكِ على فكرة
و الأحلى منها ..
ليالي جاية معاكي برضو
إسمحيلي اسهرها هيَّ كمان
بالشكل ده :))
ليست هناك تعليقات:
إرسال تعليق