بلياتشوووو
..........................
من فوق حبال غُربتكِ
إمشي ووازن خَطوتك
إوعى تُبص لتحت
أصل الوطن سابك تِعيش
بين السما والأرض
ومافيش عيون تبكيك
لو مرَّه زلِّت خطوتك ووقِعت
ومافيش كلام يرْثيك
ولا ينفتح لك قلب
وما لكش غير التعب
على صَرخِتَك تِنْشال
فوق دمعتك تِنْحَط
إضحك على الدنيا
وضحَّك أهلها
إرسم عِنيك بالطول
وبسمِتك بالعرض
لوِّن هدومك
بلون الغربه والأيام
وما تنحنيش
لو حد صقف لك
وماتنتشيش
لو حد قال لك
عيد علينا العرض
إياك تصدَّق
كل شئ ينقال
دي الدنيا من مكرها
مرات بتضحك لك
لكن الحقيقه
هيَّا أكبر سِيرْك
.........................
فاطمة المرسي
من ديوان / مَوْلِد السيدة مصر
ليست هناك تعليقات:
إرسال تعليق