وكالعادة
شربت المُر بزيادة
وجاى وشايل على كتوفى
هلاهيلى
مواويلى
وصُرة كلها خوفى
وترحيلى
أنا الحيران
أنا الشقيان
أنا اللى الغربة هدتنى
وبحر الرمل غرقنى
وحلمى عنيد وما يجيلى
وايه الحلم غير سُترة
وبيت يجمعنى والأسرة
وعيل يدخل الجامعة
وبنت لأهلها نافعة
بتكتب نسخ والرقعة
وروحى تاكلنى بالحيرة
كفاية نفضها السيرة
وعود ياغريب على بلادك
كفاية الطلة فى عيالك
دى أبقالك وأحلالك
وتضحك نفسى ..من نفسى
وأقول ياسلام..وكان نفسى
لكن ما بيدنا حيلة
وامتى بلدى تعرفنى
تحاجى علىَّ تسندنى
هناك أغراب
هنا أغرب
وأقسى الغربة فى الأوطان
ليست هناك تعليقات:
إرسال تعليق