لحن الخوف.... للشاعرة ريهام الجنزوري

لحن الخوف..
تحت وهج الشمس ب اطرح..
كام سؤال عايزين جواب
واقف ابكي واعد قتلى 
مرصصين والدم جارى
عايز اعرف بس ليه؟؟
الشاب يخرج يحمى وطنه يغدروه
مش مهم القتل إمتى بأيه وفين
المهم تقولوا ليه؟؟
تحت وهج الفكر شمسي ب تنطفي
والخوف مضلم ع اللي باقي من كياني
أيه فاضلي ف ارض بور محتاجة دمى
عشان تدمر لي فـ عيالي؟؟
والزيف مزاد م تباعه فيه ..
الأمنيات لعقول بهايم
معزوف يا لحن الخوف..
بحرفة مسجونين
عارفين كويس إيه يجيب الخوف لمين
ويرن صوت السوط بحرفة جلادين
معجونة أيدهم جوه كرباج السنين
و ها قول يا مين؟؟
ويا مين يزيح الهم عن توبي وترابي
تحت وهج الخوف أيادي..
ب تدمر مدينتي
وروح خفيه ب ـ تسطر إدانتي
كنت ب أسعى لعيشة دايمه بالكرامة
بس وهج الخوف قتلني حتى ..
خبا الابتسامة
كل دول عارفين حقيقتي
مسطرين لي كتاب بقيمتي
يعرفوا كل اللي فايت ..
من تاريخي ومن عزيمتي
شايف الخوف في اتساع
والجراد عمال ب ينهش
أرض خيرها عقول سباع
سبع خايف؟؟
ألف حسرة ع السباع المتهانين
أصل دول معجونة منهم كل ..
أنات السنين
بس لا للخوف نهاية
كل عبرة بالنهاية
أصلنا شعب انتصرنا
فكل حرب لأي غاية
كل ما يقولوا النهاية
يلاقوا منا عقول بتبني
وجيل ب يتنفس بداية

ل:‫#‏ريهام_الجنزورى‬