تعبان من كتر التفاصيل
أنا عايز ركن يكون فاضي
و 200 عملية تجميل
أو شد لتجاعيد الماضي
و اسكر من غير ما اشرب خمرة
و اهرب من غير ما ابعد سنتي
أنا عايش حاسس بمؤامرة
خلتني ما حبيتش إلا انتي
و إنتي التفاحة و قطْمتها
و البن اللي باحبه تقيل
و إنتي التفاصيل اللي نسيتها
مع إني بحب التفاصيل
بانساكي عشان أفضل فاكرك
و افتكرك كل ما بانساكي
و بابص في عينك و باذاكرك
و باغمض و أنا ماشي معاكي
الشك يقين و الخوف علّة
و أنا خايف أقرب لأتصد
ماشية في شراييني المحتلة
و أنا عمري ما سلّمت لحد
من مدة انا أصلا مستسلم
للأمر الواقع و الحيرة
باتكلم و اسكت و اتكلم
و الضحكة اقتلها بتكشيرة
الساعة أهي دخلت على واحدة
مرعوب من صوت دقات قلبي
أنا باحضن ضلّي من الوحدة
و افتحله النور - فـ ينام جنبى
ليست هناك تعليقات:
إرسال تعليق