موت وانت فرحان زيهم
وافرد إيديك
الجنة مش مِلك الجبان ـــــ ولا مِلك حد
روحك هتعرف وحدها فين الطريق
بس ابتسم
وارمي اللى جواك من وجع
أو من دموع
وارسم على كل الضلوع حرفين وبس
حاسب عنيك
موت وانت فرحان زيهم
وافرد إيديك
كُب الصور ف البترينات
أرجع لضحكك للبنات ماهو ورد متفتح عليك
الشوك ف بعدك عنهم
دى حورية طارت واستخبت جوه منك نَدهتك
زى الحقيقة ف كون سراب
والكل يشرب ويناديك
موت وانت فرحان زيهم
وافرد إيديك
عصافير ترفرف من غُناك
تفرح لها وتبُص من شبابيك عُلاك
تلاقيها ملفوتة لعنيك
سَمي بحنانها ف همستك
والليل بسرعة يردد التسابيح
مَنتاش وَلي !!
ولا ليك ضريح وقت اما يشتاق المسافر يندهك
ما أروعك
وانت اللى واخد ضحكها سكة وطريق
ما أجملك
وانت البرىء
ما اتفه الحلم اللى جي على الجراح
ما أوجع الصُبح اللى ناقص فرحتك
ياللي بغيابك غِبنا فيك
موت وانت فرحان زيهم
وافرد إيديك
ليست هناك تعليقات:
إرسال تعليق