كان نفسى أحبك....حب م النوع الفتوة
عشق م الصنف اللى هوه.....
اللى غيرته معذباه...
واللى كل شوية يتخانق عشانك
ويجيبلى بدل البلوة بلوة
وراجعلى وإنتى معوراه....
مش معترف....إنك أساسا بنت حوا
ولا إتخلقتى زيهم من طين ف طين
عنده إكتفاء ذاتى ف الحجة والبراهين
إنك ملاك.....واخد ملامحهم وبس...
بحكم عشته وسطهم..
وإن كدبوه ...!!!!
ساعتها يتلموا البنات فوق الميزان...
هتطبى بيهم كلهم....
وتغيرى قصص التاريخ..وتعيدى تجويد الحكاوى
ما أنا قبل منك ياما دوبت ف عشقهم
كانوا زى تمثال الفخار...
من برة متزوق قوى ومن جوة خاوى
كلمة "بحبك"..بتخش جواهم بيقتلها الفراغ
ماتجبش حتى القرش ساغ
صنف موجود بالغزيزة..دخانه عالى وريحته فايحه
لكن ما بيعليش دماغ......
إنتى الوحيدة اللى تحويجة ملايكة
بتدوخى القلب الرزين..إن شالله من ربط الفيونكة
عاشق ودايخ يسترك....والعشق سلطنلى الدماغ....
ليست هناك تعليقات:
إرسال تعليق