اسمه انكسار ... رباعيات للشاعرة مريم النقادي

إسمه إنكسَّـــار :
______________

إسمه إيه ؟؟
لمّا الروح جُـواك تنسّْكِبْ
وتجـف على أرض بُــور 
مفيهاش خضار ..

إسمه إيه ؟؟
لما الحبيب يجرح 
بالعَمد عينيك
ويبادلك السُّكر
مَــــرار ..

إسمه إيه ؟؟
لما الصَـديق
توفيه جمايل
وفـ وقت ضيق
يخلق ما بينك وبينه
ألف جدار ..

إسمه إيه ؟؟
لما اللى جنبك
عمره ما سألك
شايفـك بتضحَـك
وجُوه مِـنك
قايدَه نــار ..

إسمه إيه ؟؟
لما تحلم حِلم عادى
فرح عادى ..
ومَهما ف النجاح تـدادى
آخرة طريقك
إنهيــــار ..

إسمه إيه ؟؟
لما تلقى الكِدبْ عـَـام
والضمير فى إنعِــدام
والضلال فى شكّْل قُط
وأنت ف تـُوب الحق ..
فار ..!!

عارف إسمه إيه
لما تكُـون للفرح بيـت
ووقتْ دمْعــك
مالكشِ دار ..
لما تتمنى تطلـع شمْس
وأنت فى عز النهار

أيوه ده إسمه ... إنكسار !!