شعر: عبده الزرّاع
ما تيجى نعدى لامبارح
ومن خرم النهار نطلع
كما المارد من القمقم
ما يقدر حد يوقفنا
ولا حتى الطغاة تقدر
نجيب الصبح ونغنى
ومن قلب الميدان نهتف
لبكره الجاى يكون أفضل
وندفع كل نقطة دم
عشان الهم اللى هد الحيل
أكيد يرحل
•
ما تيجى نعدى لامبارح
ونلضم ضحكتين أجمل
ف عين طفله..
بتتهجى خطاويها
وعين شاب بيتغندر
•
ما تيجى نعدى لامبارح
نشق العتمة وننوّر
ظلام الليل
نكون قناديل
نكون نجمة وبتضوى
وننسى اللى سقاه نظام فاسد
لشعب فقير
فى يوم يشبع
ويوم بيجوع
•
ما تيجى نعدى لامبارح
ومن خرم النهار نطلع
نجيب مستقبل الأولاد
عشان احنا خلاص رايحيين
وهما الجاى
ليست هناك تعليقات:
إرسال تعليق