قصيدة ...نفس الريحه ...ديوان المتحولين ..صحيت النهارده ..
وف مناخيرى نفس الريحه ..
بتاعة السنه اللى فاتت ..
مع انى كنت فاكر ..
ان الشمس النهارده
هتوزع على العيال بسكوتات وشبسيات
وتوزع على العيال اللى اكبر شويه ...
كشاكيل مدرسيه ولعبة بنك الحظ ..ونضارات من الغاليه
واللى اكبر شويه...
بنطلونات جينز ...وفرحه بتحمر الخدود وتبرق العينين
واللى اكبر شويه...
عرايس وعرسان.. وشقق متزينه بضحكات مهموسه..
وازايز بريحة ياسمين معتقه ..
واللى اكبر شويه ..
عربيات محمله كراتين مليانه دفا من الاصلى ..
كنت فاكر الشمس مش هتنسى حد ...
النهارده طالع مغيم
وف مناخيرى نفس الريحه
بتاعة السنه اللى فاتت
ليست هناك تعليقات:
إرسال تعليق