من ادب الثورة / قصيدة ...25 يناير .. للشاعر حازم حسين

25 يناير

إلى أرواح شهداء الثورة

الأولة يا وطن فَتَّح عنيك ... صحصح

والتانية يا زمن إحجزلنا مطرح

والتالتة يا عفن لم البلى وروَّح

إسمي شهيد

وماليش ملامح تعرفوني منّها

أصل الرصاص ما اصطفاش

لا شكل ولا مِلَّة

ضرب الجبان ع الميدان

قطف الورود ألوان

بات الشيطان سهران

صَبَح الوطن صَلَّى

أصل الرصاص ما اصطفاش

لا شكل ولا مِلَّة

طالعين بحب الوطن

وبكره سَجَّانه

عنوانّا يحيا الوطن

وموتنا عنوانه

ضحكتنا زي الرغيف يضحك لِفَرَّانه

وحلفنا لمَّا استوينا

ماتباتي مُحْتَلَّة

أصل الرصاص ما اصطفاش

لا شكل ولا مِلَّة

الجاني يتحاكم

لكن ما يتكَرَّمش

بخروج مُشَرِّف ليه وسَبَع شهور ع العَرْش

إغضب وما تفَكَّرش

لأنه لو ما رحلش

هانحَصَّل الشُهدا

بقهر ومذلَّة

يا عاركوا يا شعبنا لو دمّنا يتهان

تبقوا دبحتوا الوطن

والشُهدا دول خرفان

هيّا البلد واقفة على عجوز خَرْفان

يخرب بيوتنا بقي

لو نجحت الشِلَّة

أصل الرصاص ما اصطفاش

لا شكل ولا مِلَّة

كان السواد حالِك

حال العبيد حالِك

وشبابنا أوحالِك

طالك ف ترحالِك

غسل بِدَمّه الشريف

ضعفك وأوحالِك

مش بس هدمة ورغيف

أو كره غالي ونظيف

قوَّى الشباب الضعيف

ده كره للمماليك

ورغبة في تمليك

الملك للمالك

زمن الشعوب العبيد

ولَّى خلاص يا اسياد

لا وراثة ولا تمديد

بعد الوطن ما انعاد

شايل دمانا دليل

على امتلاء الكيل

من العجوز العميل

وشِلِّة الأوغاد

لا علاء يا مصر ابنك

ولا جمال ابنك

ده إحنا إللي من حزنك

وعُلاكي وجمالك

كان السواد حالِك

مالِك حزينة كدة

ومسَوِّده الطرحة

أُمّ الشهيد لازم

تتغَطَّى بالفرحة

وتباهي كل الأمم

وتبكِّي كل الغنم

إللي خدعهم صنم

بخطبته الجارحة

النيل ما هوش ميَّة

النيل أغاني ودم

والثورة محمِيَّة

بسنين ملاها الظلم

فرعون يا ربّ الغجر

قصر العروبة جَبَر

وإللي جرى لِلبَشَر

لازم هايجرالك

كان السواد حالِك

حال العبيد حالِك

وشبابنا أوحالِك

طالِك ف ترحالِك

غسل بدمّه الشريف

ضعفك وأوحالِك

يا صرخة التحرير

في ساحة التحرير

طِلِع الوطن م البير

طِلِع النظام خيخة

الشعب في التدبير

والقصر شُخشِيخة

إنطق يا ملياردير بالذُّل واتشَهِّد

ماعادش فيها كبير

إلا إللي يستشهد

علشان يقول ف العَلَن

من بعد نومك زَمَن

فَتَّح عنيك يا وطن

واصبح بقى على خير

ما عادش فيها كبير إلا إللي يستشهد

علشان يقول للشعب عهد

ياكل ثائر فوق وتحت الأرض

لو مش لسَّه فاكر دمّي نام

تلاتين سنة تانيين

وأمَّا الشعوب حوالينا

تقرا الفاتحة على روحك وروحي

قول آمين

دي الثورة ما بتقتلش ثائر قال يا مصر

الثورة يا ثوَّار

بتحيي الميِّتين

الثورة ما بتقتلش ثائر قال يا مصر

الثورة يا ثوّار بتحيي الميتين

ميدان التحرير

الثلاثاء 8 فبراير