............
لسّه الحنين موجود
رغم الألام والجرح
لسّه الغرام بيجود
عز الهموم بالفرح
لسّه ف عنيكي ورود
واقفه تصلي الصبح
لسّه ف جبينك نور
يشبه شعاع الشمس
وانا قلبي ناي مكسور
يهمس بحُبك همس
لسّه يابنت الحور
ممكن أدوب م اللمس
وامّا الحروف تترص
فيكي .. يطول الشرح
لسّه الحنين موجود
رغم الألام والجرح
رغم البعاد مشتاق
حُضنك يدفّي القلب
وشفايفك الترياق
تملا الكاسات وتصُب
دا أجمل الأشياء
يا حبيبتي كاس حُب
أسكر وافوق واسكر
واطلب كمان وكمان
يجري الهوى سُكّر
مع دمّي ف الشريان
ونسيمك العنبر
يفتح ف قلبي ببان
قلبي يقول إعلان
حُبك .. بداية الفتح
لسّه الحنين موجود
رغم الألام والجرح
زيدي الهوى زيدي
وارويني من شهدك
يا أحلى تنهيدي
قلبي صبح عبدك
والدم ف وريدي
بيضخ من عندك
لو غيبتي روحي تغيب
م انا روحي هيمانه
والضحكه تبقى نحيب
والدمعه حيرانه
عمر الجراح ما تطيب
وعيوني سهرانه
تبقي اللي غلطانه
واطلب كمان الصفح
لسّه الحنين موجود
رغم الألام والجرح
لسّه يابنت الحور
ممكن أدوب م اللمس
وامّا الحروف تترص
فيكي .. يطول الشرح
من ديوان((منتهى اللذه)
ليست هناك تعليقات:
إرسال تعليق