نايمه فى عينى وحركة قلبى بينهج كونشيرتو
كما رغوة الحلم اللى تطفى النار ..
حجاكم الله ..
أنا زى شجر الرصيف زى السحاب زى الملايكه فى الجنه..
معرفش أصاحب ليل وغيم ..
ولا ضل وطن مخطوف غصب عنّى
فتلقى الحزن وحده بيتحرق جوايا كما الشوق
عشان ماأخسرش أعز صحابى
زى الموج ما يحن لبعضه ويصعب عليه الموت ع الشط
يعنى مش بطوعى ..أضحك ضحكة فقير يشتهيكى بلون الضىّ
لما تنامى فى عينى وقلبى يسمع نزيفك ..
عصفور جريح ..
نايم ع الخط..
!!
زيدى النبى صلا ..
لما تشوفى عينى بتفتح على جنة محبتك شبابيك
تشتهى الريح الخفيف وتعشق فرحتك فرحتين
بس ليه يا حبيبتى يومك يبتدى بالندى وينتهى بالدمع
زى مايكون مطر يجبرنى أخلق من صوته نغمى الحزين ..
!!
تالت حركة نزيف للروح ترد الأذى عنك..
وحدك وحسن الختام اللهم صل ع النبى ..
وعين ربنا مش بتنام فنطمن عليكى خالص خالص
بين الملايكه بتغنى وبتعزفى أحلى وأرق من ( زرياب)..
مزيكا تسكنّى
والروح تسلّمنى لغاية الباب
الله الله الله الله
نايمه فى عينى زى وردة فى أرض مالحه
سارحه وغرقانه فى النووووووووووم
وحركة قلبى وقلبك كونشيرتو
الله الله الله الله ..
زى طير الشمس مش طير البحر
يدندن تقاسيم تاخد صاحبها لحلم السكه البعيده وتهاجر بالوقت
للزمن الحى ..
نقابل ضى ..
الله الله الله الله
ليست هناك تعليقات:
إرسال تعليق