ضُم الشوارع فيها و البيت الحلال. أحمد الخدرجي

ضُم الشوارع فيها و البيت الحلال
ضُم الأغاني البِكر ف عيونها الجُمال
و ادخل ف خصلات شعرها
نسمة هوا و ما تقولش ليه
من غير عشان
من غير ياريت
احضنها تاني و ألف لو حبيت
البنت بيت
ضفايرها حبل غسيل
على قلبها البلكون
إحضُنها مزيكا \ و اتمادوا ف الرقصه
وشوشها و ارعشها
كما قوس على كمنجه
و ف حين ما تطرحلك تُفاحها و المانجه
من غير تردد كُل
البنت مش ( جزء ) ف حكايه \ البنت ( كُل )
كل الحاجات
كل القصايد و الغُنا و المفردات
كل الموسيقى و بهجة الصولوهات
كل البنات هيَّ \ ضم البنات فيها
و احضنها و اطلع بيها للسماوات