ألفين كتاب
ريهام الجنزوري... كفر الشيخ
ألفين كتاب مرسوم عليهم ..
ضي باهت
أصله خارج من قزاز شباك قديم
ومكتبة
مكتوب عليها تدوب وتهلك..
زى عافية شقيانين
وجدار قصادها بلون مترب ..
مكتوب عليه شوية قصص..
مبعوتة من زمن الحنين
وسرير ومكتب عريانين
لكن يادوب همسة أمل ..
بتبص لما الشمس تدخل كل يوم
افتح قزازي ع الشعاع..
وافرد كفوفي
ولما الشمس ترسم ضيها المنساب ف كفي
بتصد خوفي
و الاقيني بادخل جوه سرداب الأمل
تتسرسب الأشواق لقلبي وافتكر ..
أفكار دفنها الجهل جوه المعتقل
أرجع وادور جوه أوراق الكتب
عن سر دنيا بتكتفى..
بكتابة السطر الأخير من حلم طفل
بتسيبه يحلم ..
ويدون الأحلام في قلبه
لجل أما يكبر وإيديه تطول
يسترجع الأحلام ويمشى بطول مداها
بتسيبه يحلم..
لجل أما تكتب له النهاية ومرها ..
يعرف يعيش ويكون دليل وسط المتاهه
ليست هناك تعليقات:
إرسال تعليق