لوحة شمس مشروخة... للشاعر سمير فرج عبد القادر

لوحة شمس مشروخة
........................

(1) 
يمكن !
قبل ما تخلص قصيدتي
تقطف انت
اللي باقي من سنيني
إيه فاضلى ؟
وانت ماشي ليه ف ضلي؟
ع الورق
بين سطوري
في القصيده
في النتيجه
في التواريخ القديمه
والجديده
مفتتح ... دايما بصورتك

خبّط
ح تلاقيني ف انتظارك
مش ح اخافك
اوعى تدخل زي تيّار الهوا
بارد ف ليله ممطره
تكَسّر ضلوعي
قبل ما تكسّر ازاز الشيش ف اودتي
تنفرط حبات سنيني
والتقيني
دمعه فوق خدين " محمد "*
أو حزين قلبك يا " يوسف "*
قبل ما تحفظ حروف الأبجدية
قبل ما تعرف نظام الكون
وإيه هيه الماهيه ؟

(2)

ما نيش عارف
باحسك ليه
بتفرش لي الطريق ضلمه
( آه .... يا رجاء )
يا حلمي البكر ...
مكسور الجناح ناشف
عليه صبار
وشاهد من سكوت بكره
على عصري
وبيت مكسور على ضلوعي
في قصيده من ديوان الموت
مشاهد دمّ محفوظه
بتتكرّر
وانا شايفك
في لقمه تايهه عن إيدي
نفس مكروش
في غربه من جليد الذات
عشان هدمه
ياريت بالبس
إيديك دايماً بتسبقني
وداقّه لي مساميرك
حفر ... ونعوش

(3)
لون غامق
ولوحة شمس مشروخه
إيدين ياما بتخنقها
وترميها ف ضهر الكون
غياهب ...ل ... و ...ن
ومش قادر أحدّدها
تمدّ إيديك
وتكسرني،
تحدّدني،
وتشرخ شيشي جوايا
يسيل الدم من لوني
واتوه في خريطه واتهيكل
بدون عنوان

................................
سمير فرج عبد القادر