إرسمني
.........
إرسمني ف كل دفاترك شوق
وشروق
مع ضحكة شمس لأول مرّه تزور الكون
إرسمني جنون
وضفاير بنت بتتمرجح
على كتفك لما تقوم م النوم
إرسمني عيون
مش شايفه يادوب غيرك وحدك
بتدوب من لمس حرير كفّك
وكأنك عازف وصوابعك
بتزغزغ كل مافيها من الإحساس
إرسمني ولوّن ف الكراس
واعصر من بين شهد شفايفك
على كل اللوحه عصير أناناس
واغزلّي نسيجي من الأول
خليلي الجلد يكون شفاف
وتعالى ف عز البرد لحاف
دفّيني بترانيم أنفاسك
إكتبني على سطور كرّاسك
كل الأشعار
إرسملي ف عينك أحلى مدار
وانا نجمه تكون عكس النجمات
بطلعلك وحدك ليل ونهار
إعزف بصوابعك خلّيني
أتنغّم بجميع النغمات
محتاجة أكون لحن حياتك
على صدرك وحدك بس أبات
وف شِعرك إسمي يكون عندك
كل الأبيات
كل الدواوين
كل القواميس
محتاجة ف عز الليل حُبك
يصبح فوانيس
يهديني ف كل طريق أمشيه
محتاجه تطبطب على كتفي
تفتح دراعاتك وتاخدني
على صدرك وحدي اللي ادخل فيه
محتاجه ان قلبي ينام لحظه
دقّاتك بس اللي تصحيه
محتاجه أكون فعلا جوّاك
أبقالك حور
تبقالي ملاك
محتاجه اتوحّد مع روحك
مش عارف ليه؟
علشان م الأخر يا حبيبي
فعلا عشقاك
ليست هناك تعليقات:
إرسال تعليق