فى شهر أغسطس الماضى...صبيحة يوم "تسعتاشر"
ركبت جنبى ف الباص......واحدة بس إيه "فورة"...!!!
رابطة إيشارب ع الراس..وماسكة ف إيدها كام صورة
وتقريبا.........عددهم عشرة لا حداشر........
عيونها زى بنورة.....
وف خدودها براح مساحات...ب يشبه ملعب الكورة
وليها "حسنة" موجودة على حدود "التمنتاشر"
جنب الدقن والشفة ب كام "ياردة"
وكانت لابسة تنورة......"كاروه أسود ف ألوان"
وأنا ودماغى ب نترجم "يادنيا هى دى النسوان"
وكل ما أبص لعنيها ولخدودها ..أروح "شايط" هناك ضحكة
ف تيجى تملى ف "العارضة "....!!!!
تقولش دا "شوط" زملكاوى...........!!!!
ودى هاتك يانفخ وغيظ ."يارب إرحمنا م المرضى"
وأنا ف دماغى مش ساكت ..
لحد عيونها ما هترضى....
وتضحك بالفرنساوى..........
ضربت إيديا ف جيوبى وكان فيهم "لبانتين"
عزمت عليها ب "لبانة"
وكانوا ب نكهة "الموز"
وأنا ب أضحك بكل غلاسة وأسألها .."أكيد الأخت فنانة..؟"
ودى زادت ف ضرب "البوز"....وبصت ناحية "الشوز"
ساعتها قلقت وسِكت...
ركنت دماغى ع الشباك ....عملت ب إنى إيه قال نمت
وأنا ب أقنعنى بالحكمة اللى ب تقول "هتطلع بت..هتنزل بت"
وكان ف إيديا يومها كتاب...ديوانى الأول الفاشل
حاضنه ب كل تفاصيله
ولحظة ما النعاس خدنى .وقع منى على الأرض
ف وطت هى هتشيله...........
صحيت على هزة الرجلين
حاولت أسبقها متلهوج.. كسرت الشاشة ف التليفون
ساعتها العين بقت ف العين
وضحكى كان ف مرمى الجون
ضحكت بكل مافيا ..وبصت هى ف عنيا
وفتحت رمشها برقة وقفلت بعد أول جون
وعدلت روحها ع الكرسى..وقعدت ثانية بتفكر
وأنا إتحججت بصراحة ..وقولت "ياستى متشكر"
ف ضحكت زى وردة بتول ..ملانة صدق ومشاعر
وسألتنى بكل هدوء...ب تكتب شعر...؟
ف قولتلها مانش شاعر....
لكن ب أعمل محاولات..
ففردت روحها ع الكرسى ..وقالت أصلى رسامة
وإسمى "آية أبو شامة"
وساكنة ف شارع "التركى" ف حتت ساقية الصاوى
فقولتلها وأنا "عماد".. ولقب الجد "طنطاوى"
وساكن قرب "عابدين"...
فقالت طب تَشرفنا..
وقبل ما أقولها رقمك ..عشان يكمل تعارفنا...
سبقنى نداها للسواق " يا أسطى أى حتة يمين"
ونزلت زى حلم جميل ...حلمته بس مكلمشى.............!!!
ليست هناك تعليقات:
إرسال تعليق